Íþróttir | Körfubolti | mbl | 31.10.2021 | 10:15 | Uppfært 10:31

Chicago aftur á sigurbraut

DeMar DeRozan hefur verið frábær á tímabilinu. AFP

Chicago Bulls vann sinn fimmta leik af sex í NBA-deildinni í körfuknattleik á tímabilinu þegar liðið hafði betur gegn Utah Jazz, 107:99, í nótt.

Eftir að hafa unnið fyrstu fjóra leiki sína tapaði Chicago fyrir New York Knicks í síðustu umferð með minnsta mun, en brást við því með góðum leik í nótt.

DeMar DeRozan hefur farið á kostum í byrjun tímabils og skoraði 32 stig fyrir Chicago í nótt. Skammt undan var svo samherji hans Zach LaVine með 26 stig.

Donovan Mitchell átti stórleik í liði Utah eins og hans er von og visa og skoraði 30 stig.

Þetta var fyrsta tap Utah á tímabilinu í fimmta leik liðsins.

New York hefur sömuleiðis farið frábærlega af stað á tímabilinu og er einnig með fimm sigra eftir fyrstu sex leikina.

Í nótt heimsótti liðið New Orleans Pelicans og vann sterkan 123:117 sigur.

RJ Barrett fór fyrir New York og skoraði 35 stig.

Litháinn Jonas Valanciunas var gífurlega öflugur í liði New Orleans og náði tvöfaldri tvennu er hann skoraði 27 stig og tók 14 fráköst.

Níu aðrir leikir fóru fram í NBA-deildinni í nótt.

Öll úrslit næturinnar:

Chicago - Utah 107:99

New Orleans - New York 117:123

Washington - Boston 115:112

Detroit - Orlando 110:103