Mjög stolt af okkur í dag

„Það var mjög gott að ná þessum sigri í dag,“ sagði Hildur Björg Kjartansdóttir, landsliðskona í körfubolta, í samtali við mbl.is eftir 68:58-sigur á Rúmeníu í undankeppni EM í Laugardalshöll í dag.

Leikurinn var mjög jafn, en íslenska liðið sigldi fram úr á lokakaflanum og tryggði sér tíu stiga sigur. Var það í eina skiptið sem tíu stigum munaði á liðunum.

„Við vorum ekki nógu ákveðnar framan af leik. Það vantaði að ná í körfurnar og ná í stigin. Við vorum í smá vandræðum með þessa stóru inn í teig, en svo leystum við þetta sem liðsheild. Ég er mjög stolt af okkur og frammistöðunni í dag.“

Ísland mátti þola naumt tap fyrir Rúmeníu í fyrri leik liðanna og var sigurinn í dag því enn sætari fyrir vikið. „Ég var ekki með í fyrri leiknum, en ég var með slæmt bragð í munninum eftir það. Okkur fannst við eiga að klára þann leik, svo það var mjög gott að klára þetta í kvöld.“

En hvað gerði Ísland á lokakaflanum til að sigla sigrinum í höfn?

„Við sýndum að við erum með sterka leikmenn og nýttum okkur reynsluna í liðinu. Við náðum í það sem við vildum,“ sagði Hildur, áður en hún viðurkenndi að það hafi verið erfitt að þurfa að sitja mikið á bekknum í dag vegna villuvandræða: „Það er miklu erfiðara en að spila. Ef ég dett út, kemur annar leikmaður í minn stað og þetta leystist vel í dag.“

Sigurinn var sá fyrsti hjá landsliðinu í þrjú ár, en Hildur segir liðið í dag vera að byggja grunn fyrir framtíðarlandsliðskonur.

„Við erum að byggja grunn fyrir framtíðina. Við erum ekki með marga leikmenn í atvinnumennsku. Vonandi, eftir 10-15 ár, verðum við að gera enn stærri hluti. Þótt við séum ekki að vinna marga leiki, þá er þetta mjög mikilvægt fyrir ákveðinn grunn til að byggja á,“ sagði Hildur.

• Blogga um frétt