Toppliðið heimsækir nýliðana

Fjórir leikir eru á dagskrá Subway-deildar karla í körfuknattleik þegar 16. umferð fer af stað. Stórleikur kvöldsins fer fram í Ólafssal að Ásvöllum þar sem nýliðar Hauka taka á móti toppliði Keflavíkur.

Keflavík vann fyrri leikinn þar í bæ örugglega, 106:84, og eiga Haukar því harma að hefna.

Með sigri geta heimamenn auk þess saxað á forskot Keflvíkinga þar sem Haukar sitja í fjórða sæti með 20 stig og Keflavík er á toppnum með 24 stig.

Fleiri athyglisverðir leikir eru á dagskrá þar sem Stjarnan fær Tindastól í heimsókn í Garðabæinn.

Höttur fær botnlið KR í heimsókn á Egilsstaði. Höttur er í tíunda sæti með tíu stig og KR með fjögur stig í 12. og neðsta sæti.

Loks mætast Breiðablik og ÍR, sem er í næstneðsta sæti deildarinnar með átta stig, í Kópavogi.

Leikir kvöldsins:

Stjarnan – Tindastóll kl. 18.15

Breiðablik – ÍR kl. 19.15

Höttur – KR kl. 19.15

Haukar – Keflavík 20.15

• Blogga um frétt