Stórt tap gegn Spáni í lokaleik

Ísland mátti þola stórt tap, 34:88, fyrir Spáni í lokaleik sín­um í C-riðli undan­keppni EM kvenna í körfuknatt­leik í Laug­ar­dals­höllinni í kvöld. 

Spánverjar byrjuðu leikinn á 5:0 kafla áður en Anna Ingunn Svansdóttir setti fyrstu tvö stig íslenska liðsins og minnkaði muninn í 2:5. Ísland stóð almennt ágætlega í spænska liðinu í fyrsta leikhluta og settu tíu stig á móti 18. 

Annar leikhluti var þó íslenska liðinu mun erfiðari. Þá fór sóknarleikur spænska liðsins að tikka almennilega og íslenska vörnin átti fá svör. Spánn skoraði 28 stig á móti tíu hjá íslenska liðinu og leiddi í hálfleik með 26 stigum, 46:20. 

Íslandi gekk betur að verjast spænska liðinu í þriðja leikhluta og helst framan af. Íslenska liðið náði hinsvegar ekki að nýta sér góða varnartilburði í sókninni því þar vantaði mikil gæði. Er leið á leikhlutann fóru Spánverjarnir aftur að bæta við stigum og luku leikhlutanum 44 stigum yfir, 70:26. 

Íslenska liðið setti ekki stig í meira en tíu mínútur frá miðjum þriðja leikhluta til 36. mínútu. Þá nýtti Agnes María Svansdóttir bæði vítaskot sín. Stuttu síðar setti Diljá Ögn Lárusdóttir þrist og hennar 11 stig i leiknum. 

Spánverjar héldu þó áfram að hitta ofan í körfuna og unnu að lokum 54 stiga sigur, 88:34. 

Diljá Ögn var stigahæst í íslenska liðinu með 14 stig. Þar a eftir kom Sara Rún Hinriksdóttir með sex.  

Ísland lýkur keppni í þriðja sæti riðilsins með tvö stig. 

Ísland	34:88	Spánn	Opna lýsingu Loka
99. mín. skorar
Augnablik — sæki gögn...

• Blogga um frétt