Sagði Ítölunum að gera okkur greiða

„Skotnýtingin. Ég veit ekki hvað þeir voru að hitta fyrir utan þriggja stiga línuna, en það var töluvert betra en við,“ sagði Jón Axel Guðmundsson, landsliðsmaður í körfubolta, um það sem skildi íslenska liðið og það spænska af í leik liðanna í undankeppni EM í kvöld.

Frétt af mbl.is

Evrópumeistararnir reyndust of sterkir

Spánverjar voru um tíu stigum yfir stóran hluta leiks, en stungu af undir lokin og unnu 19 stiga sigur, 80:61.

„Þetta var meira og minna í tíu stigum allan leikinn. Við náðum þessu niður í fimm og þá settu þeir strax tvo þrista. Þetta er Spánn og það er ekki af ástæðulausu að þetta lið er Evrópu- og heimsmeistari,“ sagði Grindvíkingurinn við mbl.is. 

Þrátt fyrir úrslitin var Jón ánægður með frammistöðuna, á móti gríðarlega sterkum andstæðingi. „Mér fannst hún góð. Við vorum að gera vel í að finna Tryggva undir körfunni. Ef við hefðum verið að skjóta aðeins betur hefði þetta verið þægilegra hjá okkur í kvöld.“

Aðeins einn leikmaður spænska hópsins sem mætti Íslandi í kvöld lék með liðinu er það varð Evrópumeistari á síðasta ári. Þrátt fyrir það mætti íslenska liðið mjög sterku spænsku liði í kvöld.

„Við vorum ekki að spila á móti bestu leikmönnunum þeirra, en samt eru þeir mjög líkamlega sterkir og virkilega skipulagðir. Þeir vita nákvæmlega hvað þeir eru að gera í hverri einustu sókn og hverri einustu vörn. Þetta eru betri leikmenn en flestir hjá okkur hafa mætt, sérstaklega Alberto Díaz og Joel Parra, sem eru í aðalliði Spánverja. Díaz er einn besti varnarmaður Evrópu. Þetta er aðeins öðruvísi en við erum flestir vanir,“ útskýrði Jón.

Hann leikur með Pesaro á Ítalíu og það voru einmitt Ítalir sem gerðu Íslendingum greiða í kvöld, með því að vinna Úkraínu, 85:75, í sama riðli. Úrslitin þýða að Ísland fer á HM með fjögurra stiga sigri á Georgíu á útivelli í lokaleik liðsins í riðlinum. Hefði Úkraína unnið, hefði Ísland þurft að vinna með 19 stigum til að fara á HM.

„Mér líst vel á þetta. Ég talaði við Ítalina og bað þá um að gera okkur einn greiða. Við þurfum að gíra okkur upp fyrir Georgíumenn, sem munu mæta brjálaðir. Þeir spiluðu á móti Hollandi í kvöld og þurfa að ferðast eins og við. Við þurfum að vera aðeins klikkaðri en við vorum í kvöld og þurfum að spila með meira sjálfstrausti. Þetta gerist ekki betra. Ég horfði á þá á Evrópumótinu og þá sást að þetta er snargeðveik körfuboltaþjóð. Vonandi verður góð stemning og þeir með tárin í augunum á leiðinni af vellinum,“ sagði Jón Axel.

• Blogga um frétt