Sekúndubrotum of seinn

Philadelphia 76ers jafnaði í kvöld einvígi sitt við Boston Celtics í undanúrslitum Austurdeildarinnar í NBA-körfuboltanum í Bandaríkjunum í 2:2. Philadelphia vann þá 116:115 í fjórða leik liðanna á heimavelli sínum.

Óhætt er að segja að dramatíkin hafi ráðið ríkjum, því staðan eftir venjulegan leiktíma var 107:107 og því varð að framlengja.

James Harden kom Philadelphia í 116:115 þegar skammt var eftir og fékk Boston tækifæri til að skora sigurkörfuna hinum megin.

Marcus Smart fékk boltann í þann mund sem leiktíminn rann út og hitti úr þriggja stiga skoti. Því miður fyrir hann og Boston en hafði tíminn runnið út, örfáum sekúndubrotum áður en hann sleppti boltanum, og gilti karfan því ekki.

James Harden átti glæsilegan leik fyrir Philadelphia, skoraði 42 stig, tók átta fráköst og gaf níu stoðsendingar. Joel Embiid skoraði 34 og tók 13 fráköst.

Jayson Tatum skoraði 24 stig og tók 18 fráköst fyrir Boston og Jaylen Brown gerði 23 stig.

• Blogga um frétt