Vestri fær ekki að spila úrslitaleikinn

Enn á ný hefur körfuknattleiksliði Vestra á Ísafirði í 2. deild 11. flokks drengja verið meinað að spila vegna ólöglegs leikmanns. Í þetta skiptið missa þeir af úrslitaleik deildarinnar.

Körfuknatt­leiks­fé­lagið Vestri á Ísaf­irði freistaði þess fyr­ir yf­ir­stand­andi tíma­bil að finna sam­astað fyr­ir leik­mann sinn sem fædd­ur var 2005 og var einn eft­ir í sín­um flokki.

Brá Vestri á það ráð að leyfa leik­mann­in­um að keppa með ár­gang­in­um fyr­ir neðan sig, drengj­um fædd­um árið 2006 ef að öll lið 2. deild­ar væru því samþykk.

Formaður barna- og ung­lingaráðs körfuknattsdeildar Vestra leitaðist eft­ir því að heiðurs­manna­sam­komu­lag yrði gert á milli liðanna vegna þessa og fékk hann skrif­legt samþykki frá þeim öll­um áður en að tíma­bilið hófst.

Voru dæmdir ósigur eftir kvörtun

Lið Vestra endaði í 4. sæti annarrar deildar og komst þar með í úrslitakeppnina. Barst þá ábending til KKÍ frá Tindastól, sem varð í 5. sæti deildarinnar og komst ekki í úrslitakeppnina, um að ólöglegur leikmaður hafi spilað með Vestra.

Dæmdi þá mótastjórn KKÍ Vestra ósigur í tveimur leikjum og færðist liðið með því niður um eitt sæti og missti af sæti í úrslitakeppninni.

Í ljós kom að mik­ill minni­hluti körfuknatt­leiks­deild­ar Tinda­stóls var sam­mála kvört­un­inni. Baðst Tindastóll velvirðingar á mistökunum og dró lið sitt úr keppni og fékk þá Vestri aftur sæti í úrslitakeppninni.

Frétt af mbl.is

Kvörtuðu til KKÍ þrátt fyrir heiðurs­manna­sam­komu­lag

Myndu ekki aðhafast nema kæra kæmi til

Yngri flokkar Vestra sendu í kvöld frá sér yfirlýsingu á Facebook þar sem málið er rakið og nýjustu vendingar í því.

Þar stendur að í kjölfar þess að Tindastóll hafi dregið sig úr keppninni hafi mótastjórn KKÍ boðið liði Vestra sæti í undanúrslitum deildarinnar.

„Mótastjórn var upplýst um að Vestri myndi spila með ólöglegan leikmann í úrslitakeppninni ef andstæðingarnir myndu samþykkja það sem þeir og gerðu með glöðu geði. Starfsmaður mótastjórnar sagði að KKÍ myndi ekki aðhafast nema til kæmi kæra eða ábending vegna þessa,“ segir í yfirlýsingu Vestra.

Sigruðu Stjörnuna en voru dæmdir 20-0 tap

Strákarnir kepptu undanúrslitaleik við c-lið Stjörnunnar 30. apríl og unnu leikinn 67-52 og voru þar með komnir í úrslit sem áttu að verða sunnudaginn 14. maí. Sami háttur var þá hafður á fyrir úrslitaleikinn eins og með undanúrslitaleikinn.

„Andstæðingar voru beðnir um leyfi til að umræddur leikmaður fengi að spila úrslitaleikinn og var það samþykkt fúslega. Aftur var haft samband við mótastjórn KKÍ og spurt hvort þeir myndu gera athugasemdir við að umræddur leikmaður spilaði leikinn. En nú bar við annan tón og KKÍ sagði það ekki leyfilegt skv. reglugerð um körfuknattleiksmót.

Við höfum ítrekað óskað eftir svörum hver sé munurinn á undanúrslitaleiknum og úrslitaleiknum en ekki fengið svör. Í dag, 48 klukkustundum fyrir fyrirhugaðan úrslitaleik, fengum við síðan upplýsingar um að Vestra hefði verið dæmt 20-0 tap í undanúrslitaleiknum og væri því ekki í úrslitum,“ segir í yfirlýsingu Vestra.

Lýsir félagið yfir undrun sinni um að reglugerð KKÍ um körfuknattleiksmót gildi ekki um alla leiki. Það hafi ekkert verið því til fyrirstöðu að Vestri myndi mæta í úrslitaleikinn með sama lið og í alla aðra leiki vetrarins, nema KKÍ.

„Við í kkd. Vestra erum sár og svekkt vegna þessara málaloka. Sárast í þessu öllu er að vegna ósamræmis í vinnubrögðum KKÍ fá strákarnir okkar sem voru búnir að vinna sér inn sæti í úrslitum ekki að spila úrslitaleikinn á sunnudaginn,“ segir í enda yfirlýsingarinnar sem er undirrituð af Þóri Guðmundssyni formanni barna- og unglingaráðs kkd. Vestra og Neil Shiran Þórissyni formanns kkd. Vestra.

• Blogga um frétt