McGregor sendi lukkudýrið á sjúkrahús (Myndskeið)

Stórfurðulegt atvik átti sér stað í leikhléi á leik Miami Heat og Denver Nuggets í úrslitaeinvígi liðanna í NBA-deildinni í körfuknattleik á dögunum.

Þar mætti Conor McGregor, UFC bardagakappi, út á gólfið og virtist eiga að slást við lukkudýr Miami, Burnie. Atriðið endaði ekki betur en svo að McGregor kýldi Burnie það fast að Burnie lá kylliflatur. McGregor lét annað högg ríða af þegar Burnie lá og þurfti að lokum að draga lukkudýrið í burtu frá bardagakappanum.

Eftir að lukkudýrið hafði verið dregið út af gólfinu þá var maðurinn sem leikur Burnie fluttur á bráðamóttöku vegna höfuðverks eftir höggið. Þar fékk hann verkjalyf við sársaukanum en var útskrifaður þaðan eftir stutt stopp.

Denver Nuggets getur unnið sinn fyrsta NBA-meistaratitil með sigri á Miami Heat í fimmta leik liðanna á aðfaranótt þriðjudags.

Myndskeið af atvikinu má sjá hér að neðan.

• Blogga um frétt