Frakkar fengu bronsið hjá Hannesi
Setja bókamerki
Frakkland tryggði sér bronsverðlaun á EM 2023 í körfubolta kvenna með því að hafa örugglega betur gegn Ungverjalandi, 82:68, í leiknum um bronsið í Ljubljana í Slóveníu í dag.
Eins og svo oft áður í keppninni lagði sigurliðið grunninn að sigrinum með mögnuðum fyrsta leikhluta.
Frakkar voru með 18 stiga forystu, 26:8, að fyrsta leikhluta loknum og áttu ekki í teljandi vandræðum með Ungverja það sem eftir lifði leiks.
Ungverjaland náði prýðis áhlaupi í þriðja leikhluta og var þá búið að minnka muninn niður í 12 stig, 61:49.
Í fjórða leikhluta hleyptu Frakkar Ungverjum ekki nær sér en níu stigum, og það í blálokin, og sigldu að lokum öruggum 14 stiga sigri í höfn.
Hannes S. Jónsson, nýkjörinn varaforseti FIBA Europe, afhenti franska liðinu bronsverðlaunin að leik loknum.
Mamignan Touré var stigahæst í liði Frakklands með 20 stig.
Stigahæst í leiknum var hins vegar Virag Kiss með 21 stig og sjö fráköst fyrir Ungverjaland.
Frakkar höfðu hafnað í öðru sæti á undanförnum fimm Evrópumótum og vann í dag til bronsverðlauna á EM í annað sinn, en liðið hefur tvívegis orðið Evrópumeistari, síðast árið 2009.
Flóttafólk vegna skipulagsklúðurs
Mærir starfskrafta og samfélagssýn Þórðar Snæs
„Ég sé ljósið, ég sé ljósið, ég sé ljósið“
Skjálfti upp á 3,3 við Keili
E.coli baktería greindist í neysluvatni
Fagnar brú sem hann áður gagnrýndi
Jörðin hvorki flöt né kringlótt
Gerir ráð fyrir frekari málaferlum
