Breiðablik dregur lið sitt úr keppni

Körfuknatt­leiks­deild Breiðabliks hef­ur dregið kvennalið fé­lags­ins úr keppni í úr­vals­deild­inni. Þrír leik­menn liðsins riftu samn­ingi sín­um við fé­lagið í vik­unni og stóðu því fáir leik­menn eft­ir.

„Staðan er ein­fald­lega sú að það eru ekki nógu marg­ir leik­menn til að halda úti æf­ing­um, hvað þá liði í efstu deild. Á já­kvæðu nót­un­um þá hafa stúlk­urn­ar okk­ar í 9.-12. flokki verið að standa sig vel á tíma­bil­inu og mun­um við nú hlúa vel að þeim þar sem þær fá vett­vang til að þrosk­ast sem leik­menn á jafn­ingja­grund­velli,“ seg­ir m.a. í yf­ir­lýs­ingu fé­lags­ins.

Heim­ir Snær Jóns­son, formaður körfuknatt­leiks­deild­ar Breiðabliks, ræddi við mbl.is í vik­unni og sagði það koma til greina að draga liðið úr keppni, sem nú er orðin raun­in.

Yf­ir­lýs­ing Breiðabliks í heild sinni:

Til­kynn­ing frá stjórn körfuknatt­leiks­deild­ar Breiðabliks.

Fyrr í vik­unni var greint frá því að þrjár af lyk­il­leik­mönn­um meist­ara­flokks hefðu óskað eft­ir að verða leyst­ar und­an samn­ingi við fé­lagið.

Stjórn og leik­menn hafa rætt næstu skref ít­ar­lega og farið yfir hvaða mögu­leik­ar eru í þeirri erfiðu, og satt að segja sorg­legu, stöðu sem nú er upp kom­in hjá okk­ur. Það er því með þung­um hug sem við til­kynn­um að niðurstaðan er sú að Breiðablik neyðist til að draga liðið úr keppni í Su­bway deild kvenna.

Þessi ákvörðun er ekki tek­in af neinni léttúð held­ur að vel yf­ir­lögðu ráði þar sem all­ir mögu­leg­ir kost­ir hafa verið ræki­lega skoðaðir og rædd­ir í þaula. Staðan er ein­fald­lega sú að það eru ekki nógu marg­ir leik­menn til að halda úti æf­ing­um, hvað þá liði í efstu deild.

Á já­kvæðu nót­un­um þá hafa stúlk­urn­ar okk­ar í 9.-12. flokki verið að standa sig vel á tíma­bil­inu og mun­um við nú hlúa vel að þeim þar sem þær fá vett­vang til að þrosk­ast sem leik­menn á jafn­ingja­grund­velli.

Við vilj­um þakka all­an þann stuðning sem við höf­um fengið á tíma­bil­inu og horf­um bjart­sýn til framtíðar þar sem meist­ara­flokk­ur Breiðabliks mun snúa til keppni á ný áður en langt um líður.

-Stjórn körfuknatt­leiks­deild­ar og leik­menn meist­ara­flokks kvenna í Breiðablik.

• Blogga um frétt