Áfall fyrir Njarðvíkinga

Mario Matasovic, króatíski körfuknattleiksmaðurinn hjá Njarðvík, gæti misst af því sem eftir er af yfirstandandi keppnistímabili.

Matasovic meiddist á ökkla á dögunum, er ekki brotinn en illa tognaður samkvæmt heimildum mbl.is, og ljóst að um einhverra vikna fjarveru verður að ræða hjá honum.

Njarðvíkingar eiga fimm leiki eftir í úrvalsdeildinni á næstu fimm vikum. Þá hefst úrslitakeppnin í apríl og þar yrði mikið áfall fyrir Njarðvíkinga að vera án Króatans.

Þetta er sjötta tímabilið sem Matasovic leikur með Njarðvík og hann hefur verið í stóru hlutverki hjá liðinu frá byrjun. Í vetur hefur hann spilað næstmest allra í liðinu, hefur varið flest skot, er þriðji stigahæsti leikmaður liðsins og er líka þriðji í stoðsendingum.

• Blogga um frétt