Davíð Tómas Tómasson körfuknattleiksdómari er á meðal dómara á Evrópumóti U20 ára karla sem stendur yfir í Póllandi og lýkur á morgun.
Hann fékk í dag eitt af stærstu verkefnunum á mótinu þegar hann var í dómaratríóinu sem dæmdi undanúrslitaleik mótsins á milli Belgíu og Slóveníu.
Slóvenía vann þar öruggan sigur, 91:79, eftir að hafa verið yfir í hálfleik, 60:36. Slóvenar mæta því Frökkum í úrslitaleik mótsins á morgun en Grikkir og Belgar leika um bronsverðlaunin.
Ísland spilar um þrettánda sætið af sextán liðum í A-deildinni og mætir þar liði Tyrklands á morgun en það er jafnframt hreinn úrslitaleikur um áframhaldandi sæti í A-deild því þrjú neðstu liðin falla niður í B-deildina.