Strákarnir í U18 ára landsliði Íslands í körfuknattleik áttu aldrei möguleika gegn sterku liði Póllands í B-deild Evrópumótsins í Skopje í Norður-Makedóníu í dag.
Pólverjar voru með yfirhöndina frá byrjun og staðan var 57:32 í hálfleik en íslenska liðið lagaði stöðuna eftir því sem leið á leikinn og lokatölur urðu 90:71.
Íslenska liðið er með tvö stig eftir fyrstu þrjá leiki sína í riðlinum og á eftir að mæta Kósóvó og Ungverjalandi.
Birkir Eyþórsson var stigahæstur í íslenska liðinu í dag með 15 stig, Viktor Lúðvíksson skoraði 13 og Birgir Halldórsson 10.