Stórleikur Jókersins sendi Serba áfram

Serbía er komin í undanúrslit í körfubolta karla á Ólympíuleikunum í París eftir sigur á Ástralíu, 95:90, í dag. 

Serbía mætir því annaðhvort stjörnuliði Bandaríkjanna eða Brasilíu í undanúrslitum. 

Ástralía fór mun betur af stað og var 14 stigum yfir eftir fyrsta leikhluta, 31:17. 

Serbar komu sér hægt og rólega inn í leikinn en þriðji leikhluti var eign serbneska liðsins. Þar skoraði Serbía 25 stig gegn 11 stigum Ástralíu og komst yfir, 67:65. 

Ástralía vann síðasta leikhluta með tveimur stigum, jafnaði metin. 83:83, og því þurfti framlengingu. 

Þar var Serbía mun sterkari og vann að lokum fimm stiga sigur. 

Nikola Jokic fór á kostum í liði Serba og skoraði 21 stig, tók 14 fráköst og gaf níu stoðsendingar. Bogdan Bogdanovic skoraði þá 17 stig. 

Hjá Ástralíu skoraði Patty Mills 26 stig og Josh Giddey 25. 

• Blogga um frétt