Ísland upp um eitt sæti á heimslistanum

Íslenska karlalandsliðið í körfuknattleik fer upp um eitt sæti á nýjum styrkleikalista FIBA sem var gefinn út í vikunni og er nú í 48. sæti.

Ísland stendur í stað á styrkleikalista Evrópuþjóða þar sem liðið er í 24. sæti.

Ólympíumeistarar Bandaríkjanna eru sem fyrr í efsta sæti heimslistans á meðan Serbía, sem vann til bronsverðlauna, fer upp í annað sæti.

Heimsmeistarar Þýskalands halda kyrru fyrir í þriðja sæti á meðan Frakkland, sem vann til silfurverðlauna á Ólympíuleikunum í París, fer upp í fjórða sæti.

Kanada er komið upp í fimmta sæti og Spánn fer niður um fjögur sæti og er nú í sjötta sæti.

• Blogga um frétt