Endurkomusigur íslenska liðsins

U18 ára kvennalandslið Íslands vann sterkan endurkomu sigur á jafnöldrum sínum frá Eistlandi, 79:76, á Evrópumótinu í Konya í Tyrklandi í dag. 

Var sigurinn jafnframt sá fyrsti hjá íslenska liðinu á Evrópumótinu en í gær tapaði Ísland naumlega fyrir Bosníu. 

Þá eru Litháen og Bretland einnig með í riðlinum. Ísland mætir næst Litháen á morgun. 

Eistneska liðið var átta stigum yfir í hálfeik, 38:30, en Ísland minnkaði forskotið í þrjú stig í þriðja leikhluta, 53:56. 

Íslenska liðið var svo sterkara í fjórða leikhluta og vann hann með sex stigum. 

Rebekka Rut Steingrímsdóttir var frábær í liði Íslands en hún skoraði 19 stig, tók fjögur fráköst og gaf átta stoðsendingar. 

Sara Björk Logadóttir skoraði þá 13 stig, tók ellefu fráköst og gaf þrjár stoðsendingar. 

• Blogga um frétt