Íslenska U16 ára landslið drengja hafði betur gegn jafnöldrum sínum í því danska, 69:56, í B-deild Evrópumótsins í Skopje í Norður-Makedóníu í dag.
Ísland var með 32:28 forskot í hálfleik, hélt áfram að bæta í forystuna í seinni hálfleik og var sigurinn að lokum öruggur.
Njarðvíkingurinn Patrik Joe Birmingham skoraði 16 stig fyrir íslenska liðið og Róbert Nói Óskarsson, sem er í Lake Highland skólanum í Bandaríkjunum, gerði 12 stig.
Með sigrinum tryggði Ísland sér leik við Austurríki um 13. sæti mótsins á morgun.