Íslenska U16 ára kvennalandsliðið í körfubolta tapaði stórt, 77:51, gegn Litháen í B-deild Evrópumótsins í Konya í Tyrklandi í dag.
Þetta er annað tap Íslands á mótinu en liðið þurfti að þola tap gegn Bosníu. Liðið vann hins vegar sterkan sigur gegn Eistlandi í gær.
Íslenska liðið byrjaði viðureignina vel og var 17:16 yfir eftir fyrsta leikhluta. Litháen var hins vegar töluvert betra liðið í öðrum leikhluta og var staðan 37:28 í hálfleik.
Litháen stækkaði forskotið í síðari hálfleik og enduðu leikar með 77:51 sigri Litháens.
Sara Björk Logadóttir var stigahæst í íslenska liðinu með 10 stig. Hún tók einnig sjö fráköst.
Adda Sigríður Ásmundsdóttir og Rebekka Rut Steingrímsdóttir skoruðu báðar sjö stig.
Síðasti leikur riðilsins fer fram gegn Bretlandi á þriðjudaginn næstkomandi.