Bikarmeistarar Keflavíkur eru meistarar meistaranna í körfubolta í karlaflokki eftir sigur á Val á heimavelli sínum í kvöld, 98:88.
Leikurinn var jafn framan af og var staðan 32:30 Valsmönnum í vil eftir fyrsta leikhlutann. Keflavík var sterkari í öðrum leikhluta og voru hálfleikstölur 56:44, Keflavík í vil.
Keflvíkingar voru áfram með frumkvæðið í þriðja leikhluta og var staðan fyrir fjórða og síðasta leikhlutann 76:63. Voru Valsmenn ekki líklegir til að jafna í fjórða leikhlutanum.
Wendell Green skoraði 26 stig fyrir Keflavík og Hilmar Pétursson gerði 16. Taiwo Badmus skoraði 24 stig og tók 13 fráköst fyrir Val og Kári Jónsson skoraði 15.