Íslandsmeistarar Vals höfðu betur gegn bikarmeisturum Keflavíkur, 104:80, þegar liðin áttust við í fjórðu umferð úrvalsdeildar karla í körfuknattleik á Hlíðarenda í kvöld.
Valur hefur nú unnið tvo af fyrstu fjórum leikjum sínum og tvo í röð en Keflavík hefur aðeins unnið einn.
Mikið jafnræði var með liðunum stóran hluta leiksins en Valur náði þó oftar naumri forystu.
Í fjórða og síðasta leikhluta sigldu Valsmenn hins vegar fram úr og unnu að lokum öruggan 24 stiga sigur.
Taiwo Badmus fór fyrir Val og var stigahæstur í leiknum með 28 stig og 11 fráköst. Kári Jónsson bætti við 21 stigi, 11 fráköstum og sjö stoðsendingum.
Wendell Green var stigahæstur hjá Keflavík með 20 stig og tíu fráköst.