Íþróttir | Körfubolti | mbl | 22.11.2024 | 8:23 | Uppfært 10:59

Framlengd háspenna í nótt

Brandon Miller átti stórleik fyrir Charlotte í miklum spennuleik. AFP/Alex Slitz

Charlotte Hornets hafði betur gegn Detroit Pistons, 123:121, eftir framlengdan spennuleik í Charlotte í NBA-deildinni í Bandaríkjunum í nótt.

Charlotte var með 93:79-forskot fyrir fjórða og síðasta leikhlutann en Detroit neitaði að gefast upp og jafnaði í 109:109. Eftir mikla spennu í framlengingu fögnuðu heimamenn í Charlotte að lokum sigri.

Brandon Miller skoraði 38 stig fyrir Charlotte og LaMelo Ball 35. Cade Cunningham skoraði 27 stig fyrir Detroit.

Orlando Magic gerði góða ferð til Los Angeles og sigraði LA Lakers, 119:118, í miklum spennuleik. Franz Wagner var hetja Orlando því hann skoraði sigurkörfuna fjórum sekúndum fyrir leikslok með þriggja stiga skoti.

Wagner var stigahæstur hjá Orlando með 37 stig og Anthony Davis gerði 39 fyrir Lakers.

Öll úrslit næturinnar í NBA-körfuboltanum:
Charlotte Hornets 123:121 Detroit Pistons
Toronto Raptors 110:105 Minnesota Timberwolves
San Antonio Spurs 126:118 Utah Jazz
Los Angeles Lakers 118:119 Orlando Magic