Biðjast afsökunar á rasískum ummælum

Körfuknattleiksdeild KFG í Garðabæ hefur sent frá sér yfirlýsingu og beðist afsökunar á rasískum ummælum stuðningsmanns liðsins í garð dómara í leik gegn Breiðabliki í 1. deild karla á laugardaginn.

Frétt af mbl.is

Kært til KKÍ vegna rasískra ummæla (myndskeið)

Eins og mbl.is sagði frá í gærkvöld kærðu dómarar leiksins atvikið til KKÍ og kæran beinist að KFG sem heimaliði og umsjónaraðila leiksins.

Yfirlýsing KFG er sem hér segir:

Síðastliðinn laugardag mættust grannliðin KFG og Breiðablik í 1. deild karla í körfubolta. Leikurinn var hin besta skemmtun, mikill hraði og vel tekist á innan vallar.

Körfuknattleiksdeild KFG var stofnuð til að gefa ungum og efnilegum leikmönnum tækifæri á að þroskast og reyna sig í krefjandi keppni, taka skrefið fram á við og ná íþróttalegum markmiðum sínum. Við sem förum fyrir félaginu gerum miklar kröfur til okkar leikmanna, þjálfara og þeirra sem að félaginu koma. Það er því gríðarleg vonbrigði fyrir okkur sem að félaginu koma að stuðningsmaður KFG skuli láta rasísk ummæli falla í garð dómara, og skyggi þannig á það mikilvæga starf sem fram fer innan félagsins.

Rasísku ummæli stuðningsmanns KFG hafa skyggt á umræðuna eftir leikinn og þá gleði sem fylgdi ágætis frammistöðu liðsins innan vallar. Aðdragandi þessara ummæla skiptir engu máli, enda verður að gera þá sjálfsögðu kröfu á stuðningsmenn íþróttaliða að sýna háttvísi í sinni framkomu. Það skal engum vafa undirorpið að KFG fordæmir þessa orðræðu. Við biðjum dómara leiksins, þá Federick Alfred U Capellan og Einar Val Gunnarsson afsökunar fyrir hönd félagsins.

• Blogga um frétt