Landsliðskona fær leikheimild hjá Haukum

Körfuknattleikskonan Sigrún Björg Ólafsdóttir hefur fengið leikheimild hjá uppeldisfélagi sínu Haukum eftir að hafa leikið í bandaríska háskólaboltanum undanfarin ár.

Sigrún Björg, sem á sjö landsleiki að baki fyrir Íslands hönd, er 23 ára gömul og leikur í stöðu bakvarðar.

Þrátt fyrir að hafa formlega fengið leikheimild fyrir fjórum dögum sagði Kristinn Jónasson, formaður körfuknattleiksdeildar Hauka, í stuttu samtali við mbl.is að ekkert væri ákveðið í þeim efnum hvort Sigrún Björg spili með liðinu á tímabilinu.

Hún sé enn við nám í Tennessee-háskóla í Bandaríkjunum þar sem Sigrún Björg leikur með liði Chattanooga Mocs, og einbeiti sér að því en sem uppalin Haukakona sé hún vitanlega ávallt velkomin aftur til félagsins.

• Blogga um frétt