Sundkonan Snæfríður Sól Jórunnardóttir sló sitt eigið Íslandsmet en tókst ekki að tryggja sér sæti í undanúrslitum þegar hún tók þátt í undanrásum 200 metra skriðsunds kvenna á Ólympíuleikunum í Tókýó í morgun.
Snæfríður Sól synti á 2:00,20 mínútum en fyrra Íslandsmet hennar í greininni var 2:00,50 mínútur.
Endaði hún þar með í 22. sæti af 30 keppendum í undanrásum en 16 efstu tryggðu sér sæti í undanúrslitunum. Snæfríður Sól hefði þurft að synda á tímanum 1:58,33 mínútum til þess að vera á meðal 16 efstu.
Snæfríður, sem er tvítug, þreytti í morgun frumraun sína á Ólympíuleikum og ljóst er að framtíð hennar er björt.
Hún keppir næst í undanrásum 100 metra skriðsunds á miðvikudagsmorgun.