Bandaríska borgin Salt Lake City heldur vetrarólympíuleikana árið 2034 en það var frágengið með kosningu á fundi Alþjóða ólympíunefndarinnar í París í dag.
Þetta verður í annað sinn sem borgin heldur vetrarleikana en þeir voru haldnir þar árið 2002. Þegar lá fyrir að engin önnur borg kæmi til greina og Salt Lake City, höfuðborg Utah-ríkis, fékk 83 atkvæði af 89 á fundinum.
Næstu leikar fara fram á Ítalíu, í Mílanó og Cortina d'Ampezzo, árið 2026 og leikarnir árið 2030 fara fram í Ölpunum í Frakklandi.