Ólympíuleikarnir 2024 hófust fyrir rúmum klukkutíma þegar flautað var til leiks í tveimur fyrstu knattspyrnuleikjunum.
Keppni í liðsíþróttum hefst oft einum til tveimur dögum fyrir setningu Ólympíuleika og þannig er þetta nú en fyrsta umferðin í knattspyrnukeppni karla er í dag ásamt því að sjö manna rugby fer af stað.
Liðsíþróttirnar fara fram víða um Frakkland og þannig var flautað til leiks Argentínu og Marokkó klukkan 13 í St. Étienne, einmitt þar sem Ísland lék sinn fyrsta leik, gegn Portúgal, í hinni sögulegu Evrópukeppni árið 2016.
Hinn leikurinn, á milli Spánar og Úsbekistan, fer fram í París.