Þrefaldur Ólympíumeistari í bann fyrir dýraníð

Charlotte Dujardin, þrefaldur Ólympíumeistari í hestaíþróttum, hefur verið dæmd í tímabundið keppnisbann fyrir dýraníð eftir að myndband af Dujardin að slá hest í fæturna ítrekað með písk komst í fréttir.

Dujardin keppir í dressage, einskonar dansfimi á hesti, en hún stefndi á fjórðu gullverðlaun sín á leikunum í París. Engin bresk kona hefur unnið til fleiri en þrennra gullverðlauna á Ólympíuleikum.

Good Morning Britain, morgunþáttur í sjónvarpsstöðinni ITV, birti myndband af Dujardin láta höggin dynja á hesti en myndbandið er nokkurra ára gamalt. Barsmíðarnar áttu sér stað í hesthúsi Dujardin.

Frétt af mbl.is

Dregur sig úr keppni: Myndskeið sýnir „dómgreindarleysi“

Dujardin hefur viðurkennt að myndbandið sé af henni og dró sig sjálfviljug úr keppni í öllum mótum á meðan rannsókn málsins fer fram. Alþjóðahestaíþróttasambandið (FEI) staðfestir bannið í dag.

„Það sem átti sér stað var rangt og lýsir ekki hvernig ég þjálfa hestana mína eða kenni nemendum mínum, engu að síður á ég mér engar málsbætur. Ég skammast mín innilega og ég hefði átt að sýna betra fordæmi á þessu augnabliki,“ segir Dujardin í yfirlýsingu.

Rannsókn málsins er í höndum alþjóðahestaíþróttasambandsins.

• Blogga um frétt