Stórsigur Bandaríkjanna á Þýskalandi

Bandaríkin fóru létt með Þýskaland, 4:1, í knattspyrnu kvenna á Ólympíuleikunum í París í kvöld. 

Liðin áttust við á Vélodrome-vellinum í Marseille en Bandaríkin eru með sex stig eftir fyrstu tvo leikina. 

Ásamt þeim í riðli eru Ástralía og Sambía. Ástralía er með þrjú stig líkt og Þýskaland en Sambía er án stiga. 

Ástralía og Sambía mættust áðan í lygilegum leik sem fór 6:5 fyrir Ástralíu eftir að Sambía komst í 5:2. 

Ástralía mætir Bandaríkjunum í síðasta leik riðilsins en Sambía mætir Þýskalandi. 

Smith í stóru hlutverki

Sophia Smith var í stóru hlutverki í liði Bandaríkjanna en hún kom liðinu yfir á 10. mínútu. 

Giula Gwinn jafnaði metin fyrir Þýskaland á 22. mínútu, 1:1, en Mallory Swanson kom Bandaríkjunum aftur yfir fjórum mínútum síðar, 2:1. 

Smith var síðan aftur á ferðinni undir lok fyrri hálfleiksins og kom Bandaríkjunum í 3:1. Lynn Williams bætti síðan við fjórða marki Bandaríkjanna undir lok leiks. 

• Blogga um frétt