„Mér líður vel. Það er góð stemning í hópnum okkar og það eru allir á góðum stað,“ sagði Vésteinn Hafsteinsson afreksstjóri ÍSÍ í samtali við mbl.is frá Ólympíuleikunum í París þar sem hann spilar stórt hlutverk á bakvið tjöldin hjá íslenska teyminu.
Það hefur gengið á ýmsu hjá íslenska hópnum á þeim stutta tíma sem hann hefur verið í París.
„Það hefur verið svolítið rútuvesen. Rúturnar hafa komið á vitlausum tímum og rútubílstjórarnir vita stundum ekki hvert þeir eiga að fara. Það er leiðinlegt fyrir íþróttafólkið að geta ekki farið á æfingar á réttum tíma.
Annað hefur verið í flottu lagi. Sundfólkið okkar er á góðum stað, æft vel og svo er sundlaugin mjög góð. Við erum svo með sjúkraþjálfara, nuddara, lækni og sálfræðing. Íþróttafólkið er í stöðugri meðhöndlun,“ sagði Vésteinn.
Hann hefur lítinn áhuga á að vera að kvarta og horfir frekar fram á veginn.
„Ég hef alltaf litið þannig á að við eigum ekki að eyða orku í hluti sem við höfum stjórn á. Við erum alltaf með plan B, okkar eigin bíla og Uber.
Ég er sjálfur þjálfari og fyrir mér er mikilvægast að ná árangri í íþróttum. Við finnum lausnir á öllu veseni sem kemur upp. Ég er voðalega lítið fyrir að væla yfir einhverju sem við höfum ekki stjórn á. Leyfum stóru þjóðunum að gera það,“ sagði Vésteinn.