Sautjánda ólympíugull bandaríska liðsins
Setja bókamerki
Stjörnum prýtt lið Bandaríkjanna er Ólympíumeistari karla í körfubolta fimmtu leikana í röð og 17. skipti alls eftir sigur á heimamönnum í Frakklandi, 98:87, í úrslitum í Bercy-höllinni í París í kvöld.
Sömu þjóðir mættust í úrslitum í Tókýó fyrir þremur árum og þá unnu Bandaríkin einnig, 87:82.
Frakkar stóðu vel í Bandaríkjamönnum í fyrsta leikhluta, en þeir bandarísku voru þó skrefinu á undan nánast allan leikhlutann. Að lokum munaði fimm stigum eftir leikhlutann, 20:15.
Franska liðið byrjaði mun betur í öðrum leikhluta og komst það yfir, 25:24, þegar sjö mínútur voru eftir af fyrri hálfleik.
Þá tóku Bandaríkjamenn við sér, náðu forystunni á nýjan leik og héldu henni nokkuð örugglega út fyrri hálfleikinn, en staðan eftir hann var 49:41.
Devin Booker var stigahæstur hjá Bandaríkjunum í fyrri hálfleik með 13 stig. LeBron James kom næstur með sjö. Guerschon Yabusele skoraði 15 fyrir Frakka og Victor Wembanyama 13.
Bandaríkin héldu áfram að vera með völdin í seinni hálfleik og þriggja stiga karfa frá Steph Curry kom muninum í 14 stig þegar þriðji leikhluti var tæplega hálfnaður, 61:47.
Sem fyrr gáfust Frakkar ekki upp og með glæsilegum endaspretti í þriðja leikhluta tókst þeim að gera leikinn spennandi fyrir fjórða og síðasta leikhlutann, en staðan fyrir hann var 72:66.
Frökkum tókst að minnka muninn í þrjú stig þegar skammt var eftir, 82:79, en Bandaríkjamenn voru sterkari í lokin og tryggðu sér enn eitt ólympíugullið.
Steph Curry var sterkur á lokakaflanum og endaði stigahæstur í bandaríska liðinu með 24 stig. Kevin Durant gerði 15 og LeBron James 14. Wembanyama endaði stigahæstur hjá Frökkum með 26 stig. Yabusele gerði 20.
Samfylking og Viðreisn gáfu loforð
Forstjóri bendir á ábyrgð birgja vegna verðhækkana
Alvarleg netárás á Wise
„Mér finnst gamla Samfylkingin komin aftur“
Ók á hóp fólks á jólamarkaði: Einn látinn
Skattamál verði líklega „þeirra mesta klemma“
