Fyrsta transkonan sem tekur þátt

Ítalska transkonan Valentina Petrillo verður fyrsti trans íþróttamaðurinn sem tekur þátt á Paralympics, sem hefjast í París í lok mánaðarins.

Petrillo er fimmtug og gekkst undir kynleiðréttingu fyrir fimm árum.

Hún keppir í T12 flokki sjónskertra í hlaupi og sérhæfir sig í 200 og 400 metrunum.

Í samtali við BBC Sport kvaðst Petrillo hæstánægð með þátttökuréttinn, sem væri  „mikilvægt tákn um inngildingu.“

Inngilding ofar sanngirni

Ekki eru allir á eitt sáttir við þátttöku Petrillo þar sem þeim þykir það ósanngjarnt að kona sem hafi fæðst karlkyns fái að keppa gegn konum.

Þeirra á meðal er Mariuccia Quilleri, lögfræðingur og íþróttakona sem hefur tekið að sér mál fjölda íþróttafólks sem setur sig upp á móti þátttöku Petrillos í hlaupum kvenna.

„Inngilding hafði betur gegn sanngirni. Það er ekki mikið meira sem við getum gert,“ hefur BBC Sport eftir Quilleri.

• Blogga um frétt