Hjördís og Guðmundur Freyr klifurmeistarar Reykjavíkurleikanna

Klifurkeppnin á Reykjavíkurleikunum sem fram fór í fyrrakvöld var æsispennandi þar sem keppendur sýndu flott tilþrif í þrautunum þremur. 

Tíu klifrarar kepptu í úrslitakeppninnni, fimm karlar og fimm konur. Stór hluti af klifuríþróttinni er að hafa mikinn styrk í puttunum og ná góðu gripi. 

Hjördís Björnsdóttir er ein reynslumesta klifurkona landsins og sigraði í keppninni, en Hjördís fékk mikla keppni frá Lukku Mörk sem varð önnur. Lukka er ung og efnileg og stefnir hátt í klifuríþróttinni. Þriðja var Gabríela Einarsdóttir. Klifurbrautirnar voru misjafnar, konurnar héngu á hvolfi með svokölluðum tákrók meðan þær náðu réttu gripunum. 

Guðmundur Freyr Arnarson sigraði í karlaflokki, en Guðmundur sýndi að hann hefur mikið keppnisskap. Adrian Markowski Polska varð annar í karlaflokki og Birgir Berg Birgisson varð þriðji. Birgir var sá eini sem náði að klára stökkið í bleiku leiðinni af keppendunum fimm. 

Kvennaflokkur:

1. sæti Hjördís Björnsdóttir
2. sæti Lukka Mörk Sigurðsdóttir
3. sæti Gabríela Einarsdóttir

Karlaflokkur:

1. sæti Guðmundur Freyr Arnarson
2. sæti Adrian Markowski Polska
3. sæti Birgir Berg Birgisson