Ég þurfti ekki að hugsa mig um í þrjár sekúndur þegar það tækifæri bauðst að ráða mig til Stefnis,“ segir Jón Finnbogason framkvæmdastjóri fyrirtækisins en hann tók við starfinu í apríl síðastliðnum. Hann bendir reyndar á að þetta sé í þriðja sinn sem hann ræður sig til Stefnis. Verkefnin hafi sannarlega verið krefjandi og spennandi á öðrum vettvangi. Til dæmis nú síðast þar sem hann veitti lánabók Arion banka, móðurfélagi Stefnis, forstöðu. Hann segir að tíminn hjá Stefni hafi alltaf reynst eftirminnilegur.

Hann kemur inn í þetta stærsta sjóðastýringafyrirtæki landsins á krefjandi tímum. Það heldur utan um verðmæti sem þúsundir viðskiptavina treysta því fyrir sínum sparnaði. Allt frá stærstu lífeyrissjóðum til þeirra einstaklinga sem eru að fjárfesta sinn fyrsta sparnað á markaði. Er eignasafnið um 280 milljarðar króna að vöxtum í dag.

„Við erum mjög meðvituð um ábyrgð okkar og erum auðmjúk gagnvart því,“ segir Jón en starfsmenn fyrirtækisins eru á þriðja tuginn.

Lágur þröskuldur inn í sjóði

„Við rekum 27 hefðbundna sjóði sem fólk og fyrirtæki geta fjárfest í og þeir spanna allt litrófið. Sú fjölbreytni hefur m.a. skilað sér í auknum áhuga almennings en þar held ég reyndar að hið mikla og einfalda aðgengi sem app Arion banka býður fólki upp á ráði mjög miklu. Það er afar einfalt að stofna til áskriftar eða t.d. að innleysa fjármuni úr lausafjársjóðnum. Hindranirnar eru næstum engar í áskrift og lítil í einstökum kaupum til þess að byrja að fjárfesta í sjóðunum hjá okkur.“

Bendir Jón á að þátttaka almennings hafi aukist mikið síðustu misseri og nemi fjölgun viðskiptavina í reglubundnum sparnaði á þessu ári nærri 20%. Er það þvert á það sem margir myndu halda í ástandi þar sem miklar sviptingar eru á eignamörkuðum og umræða oft og tíðum fremur neikvæð.

„Það er nýtt fólk að koma inn á markaðinn sem vill spara til lengri tíma litið og þá sjáum við líka fólk byrja að spara fyrir börnin sín. Fólk er því ekki að stökkva inn á markaðinn í leit að skyndigróða og langtímahugsun er sem betur fer ekki bara bundin við starfsemi stærri fagfjárfesta.“

Tækifærin liggja víða

En Jón segir að markaðurinn sé einmitt síkvikur. Eignamarkaðir hafi verið á mikilli hreyfingu og um þessar mundir eru sjóðirnir lausafjársjóðurinn og sparifjársjóðurinn hjá Stefni með hæstu ávöxtun á markaðnum.

„Það hefði einhver þurft að segja manni það tvisvar fyrir nokkrum misserum en þessir sjóðir eru að gera góða hluti núna í þessu ástandi og það er ekki sjálfgefið. Það er skemmtilegt að segja frá því að báðum þessum sjóðum er stýrt af Ragnheiði Bjarnadóttur, sem var í doktorsnámi í hagfræði og í hópi yngri starfsmanna hjá okkur. Hún stendur sig mjög vel á þessum markaði.“

Og það verður ekki komist hjá því að spyrja Jón út í starfsmannamálin því á undanförnum vikum hefur Stefnir ráðið til sín nýtt starfsfólk með sérstaka áherslu á greiningar.

„Í þessu ástandi er enn meiri þörf fyrir greiningarhæfni en á öðrum tímum. Við erum líklegri til að taka réttar ákvarðanir eftir því sem við höfum betri yfirsýn. Það segi ég þó með þeim fyrirvara að það er aldrei hægt að sjá alla hluti fyrir eða ná fullkominni yfirsýn, hversu mjög sem áherslan er á greiningu, en hana má þó ávallt styrkja.“

Þannig hefur Stefnir ráðið til sín fimm nýja starfsmenn, ungt fólk sem býr yfir góðri menntun og fersku sjónarhorni á hlutina.

„Það er ótrúlega gefandi að kynnast þessu fólki og finna hvað það er vel að sér og hvernig það dregur þekkingu að starfseminni fyrir okkur. Ég hef mikla trú á því að það borgi sig margfalt að auka fjölbreytni hópsins og fá til okkar unga og vel menntaða einstaklinga.“

Meiri kostnaður borgar sig

Aðspurður segist hann ekki hafa áhyggjur af gagnrýni á hækkandi rekstrarkostnað.

„Auðvitað skilur maður slíkar vangaveltur en þetta eru ekki ákvarðanir sem ég tek í einhverju tómarúmi. Þetta er gert í samráði við stjórn fyrirtækisins. Rekstrarkostnaðurinn hækkar sannarlega en við teljum að rekstraráhættan minnki en að draga úr áhættu kostar sannarlega fjármuni.“

Jón segir að það sé margs konar akkur fólginn í því að ráða ungt fólk til fyrirtækisins í greiningarvinnuna. Það auki ekki aðeins breiddina í hópnum heldur búi einnig nýja liðsmenn undir að taka við ýmsum keflum á vettvangi fyrirtækisins í framtíðinni.

„Sjálfur hóf ég fyrst störf hjá Stefni árið 2003 og er hér enn. Og svo virðist sem það sé spennandi að vinna fyrir Stefni. Við auglýstum eftir starfsmönnum í gegnum Linkedin og umsóknirnar reyndust vera yfir 240 talsins. Það kom mér skemmtilega á óvart,“ segir Jón.

Það verður ekki hjá því komist að spyrja Jón út í horfurnar í íslensku efnahagslífi, enda mun það hvernig úr hlutunum spilast hafa mikil áhrif á eignasöfn Stefnis á komandi árum.

„Ég hef mikla trú á landinu. Hvort sem við lítum til tækniþekkingar, ferðaþjónustu, sjávarútvegs, áliðnaðarins, fiskeldis eða kvikmyndaframleiðslu eða annarra skapandi greina. Við stöndum vel á öllum þessum sviðum og sóknarfærin eru mörg. Tímabundnar þrengingar sem við göngum í gegnum núna finna sér farveg og við vinnum okkur út úr því.“

Mörg fyrirtæki vaxandi

Segist Jón byggja þetta mat sitt m.a. á aðkomu sinni að útlánamálum á síðustu árum.

„Ég held að þar fái maður góða tilfinningu fyrir því hvað er að gerast í hagkerfinu. Ég hef sennilega komið að yfir 8.000 lánaerindum á allra síðustu árum og þar sér maður hvað fyrirtækin eru mörg og öflug. Hugmyndirnar margar og snjallar. Við sjáum lítil fyrirtæki spretta upp sem munu að öllu óbreyttu verða stór og öflug á komandi árum,“ segir Jón.

En eru það ekki einmitt bólgnar lánabækur bankanna sem ættu að vekja okkur ugg?

„Nei, ef þú skoðar lánabækur bankanna þriggja frá til dæmis ársbyrjun 2019 og til dagsins í dag þá hafa bankarnir í raun ekki verið að auka lán sín til atvinnulífsins í svo miklum mæli á þeim tíma. Það er húsnæðismarkaðurinn sem hefur dregið vöxt lánabóka áfram og nú hægir á þeim markaði og hann mun leita jafnvægis eins og annað.“

Og Jón segir Stefni í færi til þess að koma að uppbyggingu efnahagslífsins. Það gerist með mismunandi hætti.

„Við erum farvegur fyrir sparnað fyrirtækja sem nýta sjóðina okkar til þess að geyma þann afgang sem verður af afkomunni. Það er kannski verktakafyrirtæki sem á dálítinn sjóð og leggur hann inn hjá okkur á meðan það bíður þess að kaupa nýjan vörubíl eða gröfu. Í millitíðinni sækir fyrirtækið ávöxtun á fjármagnið, svo sem í lausafjársjóðnum okkar. Svo fjárfestum við í sértryggðum skuldabréfum bankanna til að fjármagna húsnæðislánin og við kaupum hlutabréf á skráðum markaði en við höfum einnig sjóði sem fjárfest hafa í fyrirtækjum á borð við Lyfju, Hamar og svo Cambridge Plaza sem nú hefur reist glæsilegasta hótel landsins sem styrkir undirstöður ferðaþjónustunnar í landinu.“

Einn munnur en tvö eyru

En hvað er það sem gerir fyrirtæki framúrskarandi að mati Jóns. Hann vísar til frægra ummæla heimspekingsins Epíktetusar.

„Það er ekki tilviljun að við fæðumst með tvö eyru og einn munn. Við verðum að hlusta á fólk og í því felst að viðurkenna að stjórnendur hafa ekki það hlutverk að gefa einhliða skipanir um það hvernig hlutirnir eigi að vera. Það er teymið sem skiptir öllu máli og við höfum áttað okkur á því hjá Stefni fyrir löngu. Með samtalinu og að kalla eftir ólíkum sjónarmiðum finnum við bestu lausnirnar á viðfangsefnunum á hverjum tíma.“

Jón vísar þar til reynslu af öðrum vettvangi.

„Ég kom á sínum tíma með virkum hætti að starfsemi fimleikafélagsins Gerplu á árunum 2003 til 2013 og var þar formaður um nokkurra ára skeið. Við náðum frábærum árangri á þessum tíma og ég hefði getað litið svo á að það hefði verið formanninum að miklu leyti að þakka. En það var ekki þannig. Við höfðum á að skipa frábærum þjálfarahópi og öflugum iðkendum. Þau náðu að vinna vel saman. Það var lykillinn að góðum árangri.“