„Við sérhæfum okkur í ráðningum stjórnenda og sérfræðinga í öllum geirum atvinnulífsins og höfum tengt öflugasta fólkið við réttu fyrirtækin í yfir 25 ár. Það hefur verið nóg að gera allt frá því að við hófum störf,“ segir Jensína Kristín Böðvarsdóttir framkvæmdastjóri og einn af eigendum ráðninga- og ráðgjafarfyrirtækisins Vinnvinn. Fyrirtækið hefur verið rekið með hagnaði frá fyrsta degi og er eitt öflugasta ráðningafyrirtækið á Íslandi í dag.

„Við Auður Bjarnadóttir og Hilmar Garðar Hjaltason stofnuðum Vinnvinn árið 2020. Hver dagur færir okkur ný og spennandi verkefni og erum við nú orðin fimm sem störfum hjá fyrirtækinu. Við vinnum nú reyndar á við níu manns, svo mikil er ástríðan fyrir starfinu,“ segir hún og brosir.

Jensína er með áhugaverða reynslu úr atvinnulífinu. Hún hóf störf við ráðningar árið 1997 þegar hún kom að stofnun Ráðningarþjónustu Gallups, síðar Capacent, þar sem Auður og Hilmar störfuðu einnig um árabil. „Ég hef verið viðloðandi stjórnun og starfsmannamál, þar á meðal ráðningar, allar götur síðan og síðast hjá alþjóðlega ráðgjafarfyrirtækinu Valcon. Ég var framkvæmdastjóri Global Strategic Planning og HR hjá Alvogen frá árinu 2015 til ársins 2018, framkvæmdastjóri þróunar og mannauðs hjá Landsbankanum frá árinu 2010 til ársins 2015 og forstöðumaður sölu á einstaklingssviði Símans frá árinu 2007 til ársins 2010,“ segir Jensína og bætir við að reynslan af stefnumótun og innleiðingu stefnu hafi verið dýrmæt því þar fann hún á eigin skinni hversu miklu máli mönnun teyma skiptir fyrir framgang fyrirtækja.

„Eins hef ég unnið með og stýrt teymum stjórnenda í Asíu, Norður-Ameríku og Austur-Evrópu og tekið þátt í mönnun sérfræðinga og lykilstjórnenda víðs vegar um heiminn. Þessi mikla reynsla úr atvinnulífinu og það að stofna Vinnvinn með Auði og Hilmari er mín gæfa. Það er verðmætt að hafa verið „hinum megin“ við borðið og nú sem ráðgjafi, ég kem svo miklu sterkari inn í ráðningarnar,“ segir Jensína.

Starfsfólkið hjá Vinnvinn.

Töfrarnir gerast þegar rétta fólkið finnst

Enginn dagur er eins í starfsemi Vinnvinn. „Svo sannarlega ekki. Við mætum full tilhlökkunar á hverjum degi í vinnuna og höfum mjög mikinn metnað fyrir því sem við gerum. Hvernig er líka annað hægt? Við hittum áhugavert og metnaðarfullt fólk daglega, hvort heldur sem er umsækjendur um störf eða viðskiptavini. Þegar við náum að tengja rétta fólkið við réttu störfin þá gerast töfrarnir.“

Aðspurð um hvað er sett í öndvegi í Vinnvinn þá svarar hún: „Orðspor okkar og virðing fyrir viðskiptavininum er og verður ávallt lykillinn að farsæld okkar og því leggjum við mikla áherslu á trúnað gagnvart einstaklingum og fyrirtækjum. Við búum yfir áratugareynslu í ráðningum og stjórnun. Með því að sameina þekkingu okkar á ólíkum atvinnugreinum, að greina hæfni og persónuleika umsækjenda og stjórnenda, og finna þetta samspil við fyrirtækjamenninguna þá leiðum við saman rétta einstaklinga við viðskiptavini okkar.“

Hvernig virkar starfsemin?

„Einstaklingar skrá sig í gagnagrunninn hjá okkur í leit að starfi eða sækja um störf sem eru auglýst. Í einhverjum tilfellum höfum við samband við einstaklinga sem eru ekki á skrá hjá okkur, kallað „headhunting“.

Mikilvægt að hafa ástríðu fyrir fólki

Þegar kemur að ráðningum þá er mikilvægt að vera skapandi, að mati Jensínu. „Með skapandi nálgun og starfsgleðina að vopni leitum við sífellt betri leiða að bættum árangri fyrir samstarfsaðila okkar. Við höfum þrjú grunngildi sem skilgreina hver við erum og hvað við gerum, sem eru ástríða, árangur og sköpunargleði. Þú verður að hafa ástríðu fyrir fólki til að vinna við þetta starf. Árangur annarra er okkar velgengni svo við leggjum gríðarlegan metnað í okkar starf. Við brennum fyrir það sem við erum að gera og sinnum viðskiptavinum okkar vel. Sköpunargleðin verður að vera með í ferlinu því það þarf ákveðna útsjónarsemi að tengja aðila saman. Mikilvægt er að gildi og sýn einstaklinga sé í takt við fyrirtækin sem þeir vinna fyrir. Að því leytinu til þurfum við að vera skapandi,“ segir Jensína.

Er starfsfólk að færa sig meira á milli vinnustaða nú en áður?

„Það sem gerðist í kórónuveirufaraldrinum og er umtalað í dag er að fólk tók stöðuna á lífi sínu og velta fyrir sér spurningum á borð við: Fyrir hvað stendur fyrirtækið sem ég vinn fyrir? Það fóru margir að rýna í eigin gildi og í kjölfarið varð meiri hreyfing á fólki á milli vinnustaða,“ segir Jensína og bætir við að almennt sé meiri hreyfing á yngra fólki en hinum sem eldri eru.

Það er greinilegur munur á ráðningum milli landa og það er áhugavert að heyra reynslu Jensínu af ráðningum á alþjóðavísu. „Ráðningastofur erlendis sérhæfa sig oft í ákveðnum iðnaði, á meðan ráðningastofur hér heima þurfa að hafa þekkingu á öllum greinum. Við í Vinnvinn sérhæfum okkur í ráðningum millistjórnenda og stjórnenda en samt sem áður ráðum við fólk í fjölbreytt störf. Sem dæmi get ég nefnt forstjóra, framkvæmdastjóra, fjármálastjóra og stjórnarmenn. Einnig bókara, forritara, verkefnastjóra, starfsfólk í móttöku og fleiri störf. Það er því meiri sérhæfing á alþjóðamarkaði á meðan við þurfum að vera sérfræðingar á breiðara sviði.“

Kostnaðarsamt að standa í ráðningum

Í 14 ár hefur Creditinfo greint rekstur íslenskra fyrirtækja og veitt Framúrskarandi fyrirtækjum viðurkenningu fyrir árangurinn. Markviss undirbúningur og þrotlaus vinna liggur að baki þessum framúrskarandi árangri og aðeins brotabrot fyrirtækja á landinu ná viðmiðunum. Það er því eftirtektarvert að sjá Vinnvinn koma sterkt inn á listann.

„Við erum auðvitað mjög stolt og ánægð með þennan árangur en höfum sannarlega lagt mikla vinnu í að verðskulda þessa viðurkenningu. Við erum að skapa virði fyrir okkur daglega en það er eingöngu vegna þess að við erum að skapa virði fyrir fyrirtækin og stofnanir sem við störfum fyrir. Það er mikil gróska í íslensku atvinnulífi, bæði á einkamarkaði og í opinberum geira, þar sem við höfum einnig komið að stórum hluta ráðninga“ segir Jensína.

Hún bendir einnig á að fyrirtæki átti sig ekki alltaf á því hversu kostnaðarsamt það getur verið að standa í ráðningum innanhúss. „Ráðningar eru mjög tímafrekar, hvað þá ef ekki er nægilega vel vandað til verka. Á meðan ráðningar standa yfir færist athygli stjórnenda oft af öðrum verkefnum og ekki nægileg áhersla er lögð á núverandi starfsfólk. Fyrirtækin þurfa að átta sig á því að ráðningafyrirtæki hafa þekkingu á markaðnum og vita oft hvaða einstaklingar eru tilbúnir að skipta um starf,“ segir hún og bætir við að þessi markaðsþekking nýtist við farsælar ráðningar.

„Stundum sé ég tilkynningar um ráðningar þar sem það er augljóst, að mínu mati, að ráðningin muni ekki ganga vel. Oftar en ekki er viðkomandi hættur eftir stuttan tíma,“ segir Jensína Kristín Böðvarsdóttir framkvæmdastjóri og einn af eigendum ráðninga- og ráðgjafarfyrirtækisins Vinnvinn.