„Ég var 25 ára þegar ég fékk fyrst mannaforráð og þegar ég lít til baka hugsa ég með mér hvað þessi unga kona sem ég var vissi í raun lítið. Satt best að segja þá villtist ég inn í upplýsingatæknina fyrir þrjátíu árum,“ segir Valgerður Hrund Skúladóttir framkvæmdastjóri Sensa.

„Ég lærði rafmagnsverkfræði og það var kreppa á þeim tíma, þetta var í kringum árið 1994 og bitnaði ástandið sérstaklega mikið á verkfræðingum. Ég hafði hætt í vinnunni minni og var ekki búin að hugsa það skref til enda þegar Guðný Harðardóttir hjá Strá heyrði í mér og hvatti mig til að fara í viðtal hjá Tæknivali. Mér leist nú bara alls ekki vel á það í byrjun. Ég man að hún sagði: „Farðu bara að hitta þá. Þetta eru alveg rosalega skemmtilegir strákar,“ segir Valgerður og brosir.

Atvinnuviðtalið var fyrir utan þægindaramma Valgerðar en hefur greinilega gengið glimrandi vel. „Já, svona líka. Ég vissi ekkert hvað þeir voru að tala um í viðtalinu en daginn eftir var mér boðin vinna sem vörustjóri hjá Novell NetWare. Ég vissi ekkert hvað ég var að fara að gera en ég var ekki með vinnu og vildi prófa starfið í nokkra mánuði til að kynna mér upplýsingatækni. Þessi tími var æðislegur því það var svo mikið af spennandi verkefnum sem maður gat sagt já við og hlaupið áfram með. Ég fékk að stýra allskonar verkefnum og deildum á þessum tíma,“ segir Valgerður sem kom meðal annars CISCO-þjónustunni inn í Tæknival á þessum tíma.

„Það kom seinna í ljós að það myndi breyta lífi mínu þar sem ég stofnaði Sensa árið 2002, utan um sölu og þjónustu CISCO,“ segir hún og bætir við: „Það hefur nú ýmislegt gerst frá þeim tíma en í dag erum við tæplega 160 sem störfum fyrir fyrirtækið. Við erum í eigu norska fyrirtækisins Crayon Group AS og erum með starfsfólk í Noregi, Ástralíu, Serbíu, Finnlandi, Svíþjóð, Malasíu, Filippseyjum og Nýja-Sjálandi svo eitthvað sé nefnt.“

Þess má geta að Crayon er alþjóðlegt fyrirtæki með höfuðstöðvar sínar í Ósló í Noregi. Hjá fyrirtækinu starfa yfir 4.000 starfsmenn og er fyrirtækið með yfir 50 starfsstöðvar í 40 löndum. Fyrirtækið er leiðandi á heimsvísu í upplýsingatækni og stafrænum lausnum. „Sensa er þó sjálfstætt fyrirtæki og starfar á þeim grunni sem það hefur gert frá upphafi,“ útskýrir Valgerður.

Aldrei verið drifin áfram af veltu

Tekjur Sensa á síðasta ári voru ríflega 6,2 milljarðar íslenskra króna sem er talsverður vöxtur frá fyrri árum. „Ég er ekki upptekin af veltutölum heldur er ég stoltust af því að Sensa hefur frá upphafi verið rekið með hagnaði. Ástæðan fyrir því er án efa sú að við rekum fyrirtækið af mikilli varfærni og við höfum ekki verið að vaxa með því að skuldsetja okkur,“ segir Valgerður.

Síminn keypti Sensa árið 2007. „Þá tókum við yfir alla upplýsingatæknideildina þeirra. Við keyptum síðan fyrirtækin Basis og Hux og svo keypti Crayon okkur af Símanum. Þetta er löng saga sögð í stuttu máli en það sem ég er stoltust af í sögu okkar er annars vegar að vera rekin með hagnaði frá upphafi og svo er það hópurinn sem stendur á bak við reksturinn. Hann hefur verið ótrúlegur í gegnum árin,“ segir Valgerður.

Tæknin er ekki óskeikul og eru viðskiptavinir Sensa fyrirtæki og stofnanir sem gera kröfur um hátt þjónustustig og áreiðanleika í viðskiptum. „Þess vegna skiptir öllu máli að vera með gott fólk. Einkunnarorðin okkar eru: Okkur er ekki sama,“ segir Valgerður og útskýrir dýpri meiningu þeirra orða. „Það á við svo margt. Okkur er ekki sama um viðskiptavininn sem er í fyrsta sæti hjá okkur en margir þeirra hafa verið með okkur frá upphafi. Okkur er ekki sama um hvert annað, ekki sama um samstarfsaðila okkar og okkur er ekki sama um eigendur Sensa.“

Hún viðurkennir að það geti verið kvíðavaldandi að þurfa að gera allt fyrir alla. „Hér ypptir enginn öxlum og ýtir frá sér verkefnum heldur tekur ábyrgð og finnur verkefnunum réttan farveg. Það eiga ekki allir að leysa allt heldur erum við meðvituð um að við erum hluti af miklu stærri hóp sem stendur með okkur.“

Ertu búin að vera með sama starfsfólkið lengi?

„Það eru aðilar sem hafa verið með okkur í tuttugu ár, fimmtán ár og tíu ár. Svo erum við einnig með starfsfólk sem kemur nýtt inn og lætur til sín taka sem er mjög verðmætt líka,“ segir Valgerður.

Alin upp við að standa sína vakt

Þeir sem þekkja til Valgerðar vita að hún er reynslumikill en mjög hógvær leiðtogi í eðli sínu. Svo er hún talin mjög góð í að tengjast fólki. „Ætli ég sé ekki bara alin þannig upp. Maður tranar sér ekki fram, svo má alltaf deila um hvort ég geri það eða ekki,“ segir hún og brosir. „Eins hrósar maður sér ekki af verkum sínum. Ég er alin upp við að standa mína vakt og ekki að bíða eftir því að einhver komi til mín eða klappi fyrir mér. Maður þarf að varðveita sitt eigið innra virði og þarf svolítið að standa í því,“ segir Valgerður og bætir við að hún sé að þessu sögðu mjög meðvituð um að hún geri ekki hlutina ein.

„Ég er með svo frábært fólk með mér. Sem dæmi Ómar Henningsson en við erum búin að vinna saman í þrjátíu ár. Við héldum upp á það í maí á þessu ári. Ég er svo hrikalega heppin þegar kemur að fólki. Stundum horfi ég yfir hópinn hér í Sensa og velti fyrir mér hversu heppin ég er. Starfsfólkið er lykillinn að velgengni okkar að mínu mati,“ segir Valgerður.

Viðskiptavinir Sensa eru af öllum stærðum og gerðum og bjóða þjónustu sem þarf að vera pottþétt. „Það sem mér finnst skipta máli í þessu samhengi er að ég er með fólk í vinnu og við erum öll mennsk. En þegar menningin er þannig að þú getur teygt þig í næsta mann og fengið stuðning þá eru minni líkur á mistökum.“

Þar sem allt snýst um gögn

Það er áhugavert að ræða við Valgerði um tækni. Þjónusta Sensa snýst í stuttu máli um gögn. „Sensa er upplýsingatæknifyrirtæki sem sér um hýsingu, rekstur og sérfræðiþjónustu í upplýsingakerfi fyrirtækja og stofnana. Af því að allt snýst um gögn hjá okkur má segja að við fylgjum gögnunum alla leið. Frá því að þau verða til, hvort heldur sem er hjá notanda við vinnslu eða inni í fyrirtækinu. Síðan sjáum við um að gögnin séu flutt þangað sem þau eiga að fara á öruggan hátt. Að gögnin séu geymd á öruggan hátt, að þau séu afrituð á öruggan hátt, að þau séu skipulögð þannig að hægt sé að nýta þau og að það sé öruggur, þægilegur aðgangur að gögnunum fyrir þá sem eiga að nota þau,“ segir Valgerður og bætir við að skýjavegferð fyrirtækja geri það að verkum að nú sé hægt að tryggja að verið sé að geyma gögnin á réttum stöðum, með sveigjanleika og hagkvæmni í huga.

„Við teljum okkur vera í mest spennandi iðnaði sem völ er á. Við fáum verkefni frá útlöndum og flytjum þau til landsins. Það eru ekki bara tæknistörf í boði í upplýsingatæknifyrirtækjum heldur þarf að hugsa frjótt og horfa á hvað er verið að biðja um. Upplýsingatækni er meira en bara tækni, hún krefst einnig hugvits og við þurfum sífellt að vera að skoða hvernig við notum tæknina til að vinna skynsamlega og á öruggan hátt. Ég sé mörg tækifæri til að stækka og finnst framtíðin ótrúlega björt,“ segir Valgerður Hrund Skúladóttir, framkvæmdastjóri Sensa.