Hvít Billy-bókahilla frá Ikea er dýrust á Íslandi af öllum Norðurlöndunum, samkvæmt svokallaðri „Billy-vísitölu“ sem Aftenposten birtir, en þar er borið saman verð á þessu húsgagni í nokkrum löndum. Er Ísland reyndar næst-efst á listanum, og er Billy aðeins dýrari í Ísrael en á Íslandi.
Á Íslandi kostar Billy 4.900 krónur, eða sem svarar 497,8 norskum krónum. Í Ísrael kostar þessi vinsæla hilla sem svarar rétt rúmum 500 norskum krónum. Á Norðurlöndunum er hún ódýrust í Danmörku, á sem svarar 328 NOK. Þar er hún ódýrari en hjá Kínverjum, sem selja hana á 342,4 NOK.
Af þeim löndum sem eru á lista Aftenposten er Billy ódýrastur í Þýskalandi, þar sem hann er á 286,2 NOK, og er það ennfremur eina landið þar sem hillan er undir 300 norskum krónum.