Viðskipti | mbl | 26.4.2006 | 7:55 | Uppfært 8:57

Þýskur banki spáir tiltölulega mjúkri lendingu en varar við verðbólgu

Ekki er ástæða til að ætla að lending íslensks efnahagslífs nú verði jafnharkaleg og árin 2001– 2002, hvað þá að hún muni jafnast á við kreppuna í Asíu árið 1998, að mati greiningardeildar Danmerkurútibús þýska bankans HSH Nordbank, sem gefið hefur út skýrslu um ástand og horfur í íslensku efnahagslífi, en skýrslan ber heitið Iceland – Stirred, not shaken, sem útleggja mætti sem „Ísland: Hrært, en skelfur ekki.“ Bankinn hefur átt í talsverðum lánsviðskiptum við íslenska banka í gegnum tíðina.

Skýrsluhöfundar telja verðbólgu mestu og augljósustu hættuna sem að íslensku efnahagslífi steðjar. Veiki bletturinn á hagstjórn Íslands sé hins vegar ríkisfjármálin, og segja skýrsluhöfundar að þar megi aðeins stíga á bremsuna. Stór hluti þenslunnar sé til kominn vegna fjármálastefnunnar og það sé ekki heppilegt í stöðu þar sem veruleg hætta sé á ofhitnun.

Ekki eins og í Asíu
Segja þeir að hreyfingar í átt til launaskriðs á íslenskum vinnumarkaði séu varhugaverðar og ofan á það bætist verðbólguáhrif gengisveikingar krónunnar. Aftur á móti gerir HSH ekki ráð fyrir mikilli minnkun hagvaxtar á þessu og næsta ári, einkum vegna jákvæðra áhrifa gengislækkunarinnar. Þáttur einkaneyslu í hagvexti muni minnka, en þáttur útflutnings aukast í takt við lækkun gengisins. Þetta muni jafnframt hafa jákvæð áhrif á viðskiptahallann, sem margar greiningardeildir hafa gert að umtalsefni.

Bankinn telur gengi krónunnar nú vera í kringum það sem eðlilegt geti talist, en skýrsluhöfundar búast samt við frekari lækkun upp á um 5–10% vegna hefðbundins yfirskots við aðstæður sem þessar. Eins og áður segir telur HSH að Ísland muni ekki upplifa samskonar kreppu og skall á í Asíu árið 1998, einkum vegna virks eftirlits á fjármálamarkaði hér, auk sterkrar stöðu ríkissjóðs.