Viðskiptaráð Íslands kynnti skýrslu um fjármálastöðugleika á Íslandi í Kaupmannahöfn í dag og sóttu um eitt hundrað manns fundinn. Á fundinum fjölluðu prófessorarnir dr. Frederic S. Mishkin og dr. Tryggvi Þór Herbertsson um fjármálastöðugleika á Íslandi og svöruðu spurningum frá fundargestum um íslenskt hagkerfi.

Í frétt frá Viðskiptaráði kemur fram, að nokkur neikvæð umræða hefur verið um íslensk efnahagsmál í Danmörku, einkum eftir útkomu skýrslu Danske Bank.

Fram kom í máli dr. Frederic S. Mishkin að hann teldi allan samanburð á Íslandi og nýmarkaðsríkjum afar misráðinn. Hann áréttaði í máli sínu mikilvægi þess að koma áleiðis til greiningaraðila upplýsingum um íslenskt hagkerfi og að hann væri þeirrar skoðunar að mikið af þeirri gagnrýni sem fram hafi komið á síðustu mánuðum hafi að mörgu leiti verið óréttmæt.

Aðspurður sagði dr. Tryggvi Þór Herbertsson að krosseignarhald í íslensku fyrirtækjum væri mjög á undanhaldi og unnið væri að því að draga úr slíku. Megin niðurstaða höfunda er sú að hverfandi hætta er á fjármálakreppu á Íslandi.

Íslenskt efnahagslíf og stöðugleiki á landinu hafa verið mikið í umræðunni á alþjóðlegum vettvangi að undanförnu og fram kom í máli Höllu Tómasdóttur, framkvæmdastjóra Viðskiptaráðs, að fundirnir væru innlegg í umræðu um íslenskt hagkerfi og það væri von hennar að hún myndi dýpka umræðuna og ljá henni fræðilega vigt.

Fundurinn var þriðji í röðinni en VÍ stóð fyrir fundum í New York og London í maí. Fundargestir í Kaupmannahöfn voru flestir starfsmenn erlendra fjármálastofnana og greiningaraðilar lánshæfismatsfyrirtækja.

Tengdar fréttir

Skýrslur um bankana

Jákvæðari tónn í nýrri skýrslu Merrill Lynch

• Bankarnir ekki eins háðir efnahagsumhverfinu samkvæmt Fitch
• Markaðsaðilar ofmátu hættuna á bankakreppu á Íslandi, samkvæmt Moody's
• Skuldabréf bankanna sögð ódýr
• Danski bankinn Jyske bank með nýja skýrslu um íslenska hagkerfið

» Fleiri tengdar fréttir

• Blogga um frétt