Viðskipti | mbl | 27.6.2006 | 9:24 | Uppfært 10:50

Verkefnisstjóri samfélagsmála Alcoa á Norðurlandi

Kristján Halldórsson

Kristján Þ. Halldórsson, rekstrarverkfræðingur, hefur verið ráðinn verkefnisstjóri samfélagsmála fyrir Alcoa á Norðurlandi. Hann mun starfa að undirbúningsvinnu vegna hugsanlegs álvers á Norðurlandi í framhaldi af samkomulagi ríkisstjórnarinnar, Húsavíkurbæjar og Alcoa um að kanna nánar hagkvæmni þess að reisa 250 þúsund tonna álver á Bakka við Húsavík.

Kristján var formaður samstarfsnefndar um sameiningu sjö sveitarfélaga á Norðausturlandi og leiddi síðan sameiningu fjögurra þeirra. Kristján sat í sveitarstjórn Öxarfjarðarhrepps síðastliðin átta ár og hefur sinnt margvíslegum nefndarstörfum fyrir hreppinn, samkvæmt fréttatilkynningu.

Starf Kristjáns felst fyrst og fremst í því að miðla upplýsingum um Alcoa og hugsanlegt álver á Húsavík til hagsmunaaðila á Norðausturlandi, svo sem sveitarfélaga, stofnana félagasamtaka og íbúa. Hann mun einnig miðla upplýsingum til Alcoa um það sem helst er í deiglunni á svæðinu og snertir verkefnið á einhvern hátt.

„Ljóst er að samfélagsleg áhrif hugsanlegs álvers á Bakka við Húsavík verða mikil. Um 300 ný störf verða til í álverinu sjálfu og samkvæmt skýrslu, sem var unnin um samfélagsleg áhrif álvers við Húsavík, verða afleidd störf milli 900 og 1050 á landsvísu, þar af 600 til 800 í Þingeyjarsýslu. Á Akureyri og Eyjafjarðarsvæðinu verða þau 150 til 200. Verði af framkvæmdum má gera ráð fyrir því að fólksfjölgun vegna álversins á Bakka verði um 1000-2000 manns í Þingeyjarsýslu," að því er segir í tilkynningu.

Kristján Þ. Halldórsson er Þingeyingur, fæddur 1961, og búsettur á Kópaskeri. Hann lauk BSc námi í tölvunarfræði frá Háskóla Íslands árið 1985 og í rekstrarverkfræði frá háskólanum í Álaborg árið 1992. Á undanförnum árum hefur hann unnið að margvíslegum störfum fyrir fyrirtæki á Norðausturlandi og einnig sem sjálfstæður ráðgjafi, bæði að málefnum sveitarfélaga og verkefnum sem lúta að rekstri fyrirtækja og hugbúnaðarþróun. Síðastliðið ár starfaði Kristján sem atvinnuráðgjafi í hlutastarfi hjá Atvinnuþróunarfélagi Þingeyinga. Kristján er kvæntur Sigríði Kjartansdóttur, sjúkraþjálfara. Þau eiga fjögur börn.