Gunnar Sigurðsson, framkvæmdastjóri Baugs í Bretlandi, segir í samtali við Morgunblaðið að frétt breska blaðsins Daily Telegraph um helgina sé verulega orðum aukin, um að Baugur ætli sér að selja ýmsar eignir í Bretlandi í sumar.

Þvert á móti sé það stefna félagsins að styrkja eignasafn sitt í breskum verslanakeðjum, hvort sem er í sölu á matvöru, fatnaði, leikföngum eða skartgripum. Engar ákvarðanir hafi verið teknar um að selja einhverja ákveðna hluta. Baugur hafi verið að fjölga starfsmönnum sínum í Bretlandi og til standi að fara í útrás frá Bretlandi til markaða eins og á Norðurlöndunum, í Þýskalandi, Bandaríkjunum, Indlandi og til Miðausturlanda, t.d. með Hamleys í Dubaí og Kúveit.

Endurfjármögnun á keðjum

Í frétt Daily Telegraph var bent á að Baugur hefði ekki selt neina af þeim verslanakeðjum sem félagið hefði keypt á undanförnum fjórum árum. Var haft eftir Gunnari að hugsanlega yrðu eignir seldar í sumar. Hann segist hafa verið spurður að því hvernig Baugur ætlaði að ná tekjum út úr sínum fjárfestingum, og bent blaðamanninum breska á leiðir sem hefðu t.d. verið farnar við endurfjármögnun á keðjum Iceland og Jane Norman, og bent einnig á yfirtökutilboðið í Mosaic Fashions.

Helstu verslanakeðjur Baugs í Bretlandi eru Hamleys leikfangakeðjan, matvöruverslanir Iceland, sameiginleg skartgripakeðja Goldsmiths og Mappin&Webb, og tískuverslanir á borð við Oasis, Karen Millen, Jane Norman og MK One. Þá á Baugur umtalsverðan hlut í Woolworths og Moss Bros.