Viðskipti | mbl | 31.5.2007 | 10:08 | Uppfært 10:25

Leggja fram 85% hærra tilboð í Vinnslustöðina en heimamenn

Mikil átök virðast í uppsiglingu um Vinnslustöðina í Vestmannaeyjum. mbl.is/Brynjar Gauti

Stilla ehf., félag í eigu bræðranna Guðmundar Kristjánssonar, forstjóra Brims, og Hjálmars Kristjánssonar, hefur ákveðið að leggja fram samkeppnistilboð í allt hlutafé Vinnslustöðvarinnar í Vestmannaeyjum. Er tilboðið komið fram vegna yfirtökutilboðs Eyjamanna ehf., félags hluthafa í Vinnslustöðinni og er 85% hærra. Félög tengd Stillu eiga samtals 25,79% af heildarhlutafé Vinnslustöðvarinnar og er markmið félagsins að eignast allt hlutaféð.

Fram kemur í tilkynningu til Kauphallar Íslands, að tilboð Stillu gildi til 11. júní. Tilboðið er gert af hálfu óstofnaðs eignarhaldsfélags í eigu Stillu og verður tilboðsverðið 8,5 á hvern hlut. Er það 85% hærra en boðið er í hvern hlut í skyldutilboði Eyjamanna ehf., sem nú er í gildi og raunar það hæsta, sem boðið hefur verið í hlutabréf í félaginu.

Eyjamenn ehf. er félag hóps hluthafa, sem samtals eiga 50,04% í Vinnslustöðinni og hafa gert með sér samkomulag um stjórnun og rekstur félagsins. Um er að ræða félög tengd Sigurgeiri B. Kristgeirssyni, framkvæmdastjóra félagsins, og Haraldi Gíslasyni sem sér um mjölsölu Vinnslustöðvarinnar auk þess sem ýmsir aðrir hluthafar frá Vestmannaeyjum standa að félaginu. Yfirtökutilboð félagsins er á genginu 4,6.

„Það er mat Stillu ehf. að samkeppnistilboðið endurspegli sanngjarnt raunvirði félagsins í dag þegar tekið er tillit til afkomu og eigna félagsins svo og verðlagningu sambærilegra félaga í íslenskum sjávarútvegi á undanförnum misserum. Með hliðsjón af þessu telur Stilla ehf. að tilboð Eyjamanna ehf. sé of lágt og sé fjarri því að endurspegla sanngjarnt mat á virði félagsins. Það sé raunar staðfest í viðskiptum sem hafa verið með hlutabréf í félaginu í kauphöll eftir að yfirtökuskylda myndaðist og áður en skyldutilboðið var sett fram þann 9. maí 2007 en gengi hlutabréfa í félaginu þann 8. maí 2003 var kr. 8,30 á hlut. Þess er ekki getið í skyldutilboðsyfirliti Eyjamanna ehf. og endurspeglar yfirlitið þvi ekki rétt verðmæti félagsins þegar skyldutilboðið var sett fram," segir í tilkynningu Stillu í dag.

Þá segir, að Stilla fyrirhugi sömu áherslur og verið hafa í starfsemi félagsins eftir yfirtökuna. Ákjósanlegt sé að reka öflugt sjávarútvegsfyrirtæki eins og Vinnslustöðina í Vestmannaeyjum enda séu þar kjöraðstæður fyrir slíka starfsemi.

Í tilkynningunni segir, að Stilla sé ósammála fyrirætlunum Eyjamanna ehf. um að afskrá félagið úr Kauphöll Íslands og hyggur á áframhaldandi skráningu þess í kauphöllinni sé þess kostur. Í því skyni hyggist Stilla í kjölfar yfirtökunnar selja stóran hluta hlutabréfa í félaginu til ýmissa aðila, sem hafi áhuga á rekstri öflugs sjávarútvegsfyrirtækis í Vestmannaeyjum, sem skráð sé í kauphöll. Virk verðmyndun á markaði þjóni best hagsmunum félagsins og hluthafa þess og tryggi áframhaldandi rekstur og uppbyggingu félagsins.

Takist það ekki muni félagið vera á samstæðugrundvelli talsvert skuldsett að yfirtökunni lokinni þar sem Stilla hafi í hyggju að fjármagna umtalsverðan hluta kaupverðsins með lánsfé. Geti þá komið til þess að félagið verði afskráð úr kauphöllinni með þeim afleiðingum að verðmyndun og viðskipti með hluti í félaginu verði fremur óvirk.