Bandaríski fjárfestingarbankinn Lehman Brothers varð gjaldþrota í nótt. Þreifingar um að annar banki keypti hann urðu að engu. Lehman tapaði mörgum milljörðum dollara á húsnæðislánum í Bandaríkjunum.  Þá var og staðfest að Bank of America muni yfirtaka Merril Lynch fyrir 50 milljarða dala, jafnvirði 4500 milljarða króna.

Lehman var fjórði stærsti fjárfestingarbanki Bandaríkjanna. Óttast er að örlög hans muni hafa gífurleg áhrif á fjármálamörkuðum um heim allan. Mikil lækkun varð á mörkuðum í Asíu í morgun, þegar fregnirnar bárust.

Gengi dollarans snarlækkaði gagnvart evru og jeni. Búist er við mikilli lækkun á mörkuðum í Evrópu og Bandaríkjunum í dag.

Fjárfestingabankinn Merryl Lynch hefur einnig tapað miklu í fjármálakreppunni. Með kaupum Bank of America á honum verður til stærsta fjármálaþjónustufyrirtæki í heimi.

Viðræður um kaup Barclays-bankans eða Bank of America á Lehman stóðu yfir um helgina, en fóru út um þúfur.

Lögreglan hefur girt af höfuðstöðvar Lehman í New York, og fréttamaður BBC segir, að starfsfólk bankans hafi yfirgefið bygginguna með pappakassa í höndum. Alls vinna um 25.000 manns hjá bankanum.

New York Times segir frá því, að tíu stórir bankar hafi ákveðið að stofna neyðarsjóð með 70-100 milljörðum dala, sem fjármálastofnanir geti sótt um fé úr til að mæta afleiðingunum af falli fjárfestingarbankans Lehman Brothers.  

Tengdar fréttir

Bankakreppa

Biðu sömu örlaga og Ísland

• Vilja að bankarnir endurgreiði aðstoðina
• Merki um siðrof í þjóðfélaginu
• Eignir metnar á 775 milljarða
• Auknar álögur á íbúa Grimsby

» Fleiri tengdar fréttir

• 1 blogg um fréttina

Bloggað um fréttina

• Eyþór Laxdal Arnalds: Tveir risabankar kvöddu um helgina