„Afkoma veldur vonbrigðum

Sala dróst saman á fyrri hluta ársins miðað við sama tíma í fyrra hjá Nýherja og var heildartap 15 milljónir á fyrstu 6 mánuðum ársins. EBITDA var 210 milljónir króna og gekk rekstur Nýherja móðurfélags og TM Software ehf. vel, meðan tap varð af rekstri erlendis. Kemur þetta fram í árshelmingsuppgjöri sem Nýherji sendi frá sér.

Þórður Sverrisson, forstjóri félagsins, segir í tilkynningunni: „Rekstur Nýherja móðurfélags og TM Software ehf. gekk vel og var hagnaður umfram áætlanir. Tap var hins vegar af rekstri Applicon félaganna á Íslandi og í Danmörku. Afkoma félagsins veldur vonbrigðum, því áætlanir gera ráð fyrir um 258 m.kr. EBITDA hagnaði á fyrri árshelmingi. Nokkur óvissa er um rekstur erlendra dótturfélaga, en gert er ráð fyrir að áfram verði góður gangur í innlendum rekstri.“ 

Segir einnig í skýrslunni að „afkoma og tekjur Nýherja hf., móðurfélagsins, voru vel yfir áætlunum á öðrum ársfjórðungi. Tekjur af vörusölu voru yfir væntingum og afkoma af tækniþjónustu fer batnandi, meðal annars vegna góðrar eftirspurnar í alrekstrarþjónustu og hagræðingar í rekstri.“

Applicon félögin á Íslandi og Danmörku skiluðu tapi og segir að ástæðan sé hörð verðsamkeppni á SAP markaði og hærri kostnaður en áætlaður var við uppsetningu kerfa og þróun nýrra lausna, sem unnið var að á Íslandi og í Svíþjóð. TM Software skilaði aftur á móti mjög góðri afkomu og voru það Tempo tímaskráningarkerfið og Sögu kerfið, sem er rafrænt sjúkraskráningarkerfi sem einkum seldust vel.

Aðrar lykiltölur í skýrslunni eru meðal annars

• Heildarvelta nam 7.492 milljónum króna fyrstu 6 mánuði ársins 2012 og dróst saman um 178 milljónir frá fyrra ári, eða um 2,3%.
• Meðalfjöldi stöðugilda fyrstu 6 mánuði ársins var 521 en var 529 á sama tíma í fyrra.
• Hagnaður fyrir afskriftir, fjármagnsliði og skatta - EBITDA - var 210 m.kr. á tímabilinu en var 300 milljónir fyrstu sex mánuði árið 2011.

• Blogga um frétt