Þýskaland heldur AAA-einkunn

Matsfyrirtækið Standard  og Poor's hefur staðfest topplánshæfiseinkunn fyrir Þýskaland með stöðugum langtímahorfum. Fylgir fyrirtækið þar með ekki í kjölfar Moody's sem lækkaði langtímahorfur ríkisins úr stöðugum í neikvæðar í síðustu viku.

Sagði í greinargerð Standard og Poor's að „þýski efnahagurinn hefði jafnað sig nokkuð vel síðan 2010, studdur af sterkum útflutningi og auknum fjárfestingum“. Sagði stofnunin að staða Þýskalands, í þeim alþjóðlega efnahagsvanda sem núna stæði yfir, væri svo styrk vegna „langvarandi uppbyggingar hjá fyrirtækjum, hófsemi í launamálum og mikils sparnaðar“.

Standard og Poor's hefur lækkað lánshæfiseinkunn margra landa síðasta árið og má þar á meðal nefna að Frakkland og Bandaríkin voru bæði sett í AA-flokk, sem er einum lægri en AAA sem Þýskaland er í.

• Blogga um frétt