Verslun dregst saman

Verslun dróst töluvert saman í júlí miðað við sama mánuð í fyrra. Dagvöruverslun fór niður um 3,4% á föstu verðlagi, en þegar leiðrétt hefur verið fyrir árstíðabundnum þáttum var samdrátturinn 1,6%. Sala á áfengi, fötum og skóm dróst einnig saman og var fór áfengissalan niður um 17,9% á föstu verðlagi. Þetta kemur fram í nýjum tölum frá Rannsóknasetri verslunarinnar.

Segir einnig að sala raftækja og húsgagna hafi aukist um 5% og 12,3% á föstu verðlagi. Þeir tveir flokkar telja þó aðeins fyrir um 12% af heildarútgjöldum þessara flokka sem skoðaðir eru og því má segja að verslun heimilanna hafi talsvert dregist saman frá fyrra ári.

Bendir rannsóknasetrið sérstaklega á að fataverslun hafi dregist saman. „Fataverslun minnkaði um 11,7% í júlí miðað við sama mánuð í fyrra á föstu verðlagi og um 8,7% á breytilegu verðlagi á sama tímabili. Leiðrétt fyrir árstíðabundnum þáttum minnkaði velta fataverslunar í júlí um 2,8% frá sama mánuði í fyrra. Verð á fötum hækkaði um 3,4% frá sama mánuði fyrir ári. Velta skóverslunar dróst saman um 11,8% í júlí á föstu verðlagi og um 7,3% á breytilegu verðlagi miðað við sama mánuð fyrir ári. Verð á skóm hækkaði um 5,1% frá júlí í fyrra.“

Neysla ferðamanna skiptir töluverðu máli í þessu sambandi, en í þessum tölum er ekki tekið mið af aukningu í sölu hjá verslunum sem flokkast undir svokallaðan ferðaþjónustureikningi Hagstofunnar. Rannsóknarsetrið gerir ráð „fyrir að um 15% neyslu erlendra ferðamanna hér á landi sé varið til smásöluverslunar. Í síðasta mánuði var velta erlendra greiðslukorta hér á landi 13,1 milljarður króna. Samkvæmt þessu má ætla að ferðamenn hafi varið næstum tveimur milljörðum kr. í verslun hér á landi í síðasta mánuði.“

Samdrátt í fatasölu þarf einnig að skoða í því samhengi að Íslendingar eru byrjaðir að ferðast meira erlendis en áður og samkvæmt tölum frá Seðlabanka Íslands hefur kreditkortavelta Íslendinga erlendis aukist um 7,9% síðasta árið og um 6,6% á debetkortum. Velta íslenskra greiðslukorta erlendis er um 9% af heildarveltu kortanna og í ljósi þess að margir fara erlendis í verslunarferðir telur aukning í verslun erlendis eitthvað af fataverslun hérlendis.

Taflan sýnir breytingu á verslun í júlí miðað við fyrri mánuð og fyrra ár. Rannsóknasetur verslunarinnar

• Blogga um frétt