Bréf í Facebook enn á niðurleið

Bréf í Facebook halda áfram að falla og eru nú rétt undir 20 Bandaríkjadollurum á hlut, en þegar þau fóru á markað voru þau metin á 38 dollara. Hafa bréfin lækkað um tæplega 6% það sem af er degi, en á þriðjudaginn greindi mbl.is frá því að viðskipti frumfjárfesta og starfsmanna gætu lækkað gengi bréfanna enn frekar, en opnað var fyrir viðskipti hluta af bréfum þessara aðila í dag. Ekki er vitað hvort skjálfti í markaðsaðilum eða aukið framboð bréfanna hafi ollið lækkuninni í dag, en bréf félagsins hafa verið í frjálsu falli frá skráningunni á maí.

Á næstu 9 mánuðum verður opnað fyrir viðskipti með 2 milljarða bréfa í viðbót, svo fróðlegt verður að sjá hvort svipuð lækkun muni halda áfram út árið eða ef Facebook nær að snúa taflinu við og sannfæra fjárfesta um möguleika fyrirtækisins til að skila góðri arðsemi.

• Blogga um frétt