Advania semur við Thomas Cook

Alþjóðlega ferðaþjónustufyrirtækið Thomas Cook hefur samið við Advania um innleiðingu á samskiptahugbúnaði fyrir viðskiptavini fyrirtækisins á Norðurlöndum. Verkefnið nær til 200 umboðsaðila Thomas Cook Scandinavia, sem er hluti af Thomas Cook Group, sem hefur hátt í 40 þúsund starfsmenn á heimsvísu og veltir um 1.800 milljörðum króna.

Verkefnið verður unnið af Advania í Svíþjóð þar sem starfa um 300 manns, en gert er ráð fyrir að um 100 starfsmenn komi að verkefninu og að það taki um hálft ár í vinnslu. Ekki er upplýst um upphæð samningsins.

Búnaðurinn byggist á tækni frá Interactive Intelligence, samstarfsaðila Advania, sem nefnist Customer Interaction Center (CIC). Í tilkynningu frá félaginu er haft eftir Tommy Jakobsson, upplýsingatæknistjóri hjá Thomas Cook Scandinavia að „nýja samskiptalausnin færir alla samskiptamiðla – vefspjall, tölvupóst, síma og svo framvegis – í eitt miðlægt kerfi með samhæfðu og einsleitu viðmóti.“

„Þetta er þýðingarmikill samningur og mikill að vöxtum. Samningurinn er jafnframt ákveðinn gæðastimpil á CIC-lausnina og starfsemi Advania í Svíþjóð. Það er ánægjuefni að Gartner hafi mælt með CIC og að Advania hafi síðan orðið fyrir valinu. Við áætlum að lausnin verði í heild sinni komin í fulla virkni núna fyrir áramótin,“ segir Gestur G. Gestsson, forstjóri Advania.

• Blogga um frétt