13 milljarðar aukalega í varúðarfærslu

Stærstu viðskiptabankarnir þrír gætu þurft að bæta við rúmlega 13 milljörðum  til viðbótar við þá 67 milljarða sem hafa verið settir í varúðarfærslur vegna áhrifa dóms um lögmæti útreiknings á gengistryggðum lánum. Þetta kemur fram í könnun Fjármálaeftirlitsins á áhrifum dómsins á fjórar mismunandi sviðsmyndir.

Lánum er skipt upp í 5 mismunandi flokka eftir því hversu líklegt sé að þau teljist ólögleg. Samtals eru áhrif af lánunum talin geta verið um 165 milljarðar, en þar af er rúmlega 50% í stærsta flokknum, sem jafnframt er sá flokkur sem lán hafa þegar verið dæmd ólögleg eða mjög líklegt er að verði dæmd ólögleg. Á síðasta ári höfðu bankarnir þegar afskrifað 67 milljarða af þessari upphæð og í kjölfar dómsins í febrúar síðastliðinn var bætt við um 65 milljörðum í varúðarfærslur. Samtals hefur því verið gert ráð fyrir 132 milljörðum vegna lækkaðra krafna vegna gengislána.

Í verstu niðurstöðunni sem Fjármálaeftirlitið skoðar er gert ráð fyrir að bankarnir þurfi að færa niður um 145 milljarða og því gætu þeir þurft að bæta við um 13 milljörðum í varúðarfærslur í kjölfar dómsins í gær, þar sem Arion banki var dæmdur til að lækka skuld Borgarbyggðar um nærri 85 milljónir vegna ólöglegs endurútreiknings.

Í dag hafa bæði Landsbankinn og Arion banki gefið frá sér yfirlýsingu um málið þar sem sagt er frá því að ákveðin álitamál séu enn óútkljáð. 

• Blogga um frétt