Útsölur hefjast á morgun

Útsölur hefjast á morgun í bæði Smáralind og Kringlunni, en almennt hefjast útsölur í verslunarmiðstöðvunum á þriðja degi ársins. Þó er eitthvað um að forsölur hefjist eftir klukkan 5 í dag að sögn Sigurjóns Arnar Þórssonar, framkvæmdastjóra Kringlunnar. Segir hann að útsölurnar í Kringlunni muni standa frá 3. janúar til 3. febrúar, en hann gerir ráð fyrir góðum útsölum í ár.

Sturla Gunnar Eðvaldsson, framkvæmdastjóri Smáralindarinnar, segir að gjafakortseigendur muni væntanlega margir koma að versla á fyrstu dögum ársins. „Jólaverslunin var mjög góð og gífurlega mikil sala í gjafakortum. Það verða væntanlega margir sem munu nýta sér það á útsölunum.“

Á báðum stöðum verður eitthvað um forsölur í kvöld, en það er alfarið á vegum hverrar verslunar fyrir sig sem þá auglýsa slíkt fyrir sína viðskiptavini, til dæmis gegnum markpóst eða samfélagsmiðla.

• Blogga um frétt