Í morgun undirritaði orkumálastjóri leitar- og vinnsluleyfi á Drekasvæðinu fyrir hópa sem höfðu sótt um í öðru útboði Orkustofnunar. Steingrímur J. Sigfússon, atvinnuvega- og nýsköpunarráðherra segir að það sé mikill styrkur af því að fá norska þátttöku í málið, en ríkisolíufélagið Petoro nýtti sér ákvæði í samningi milli Íslands og Noregs og verður 25% þátttakandi í báðum umsóknunum. Segir hann nauðsynlegt að hafa fæturna á jörðinni þar sem þetta skref sé ekki ávísun fund á allra næstu árum, heldur geti leitin tekið 5 til 10 ár.

„Við höfum átt í mjög góðu samstarfi við Noreg, bæði milli ráðuneyta og stjórnsýslunnar sem koma við sögu og þetta mun frekar en hitt auka á það“ segir Steingrímur, en hann segir að fyrirtækin sjálf muni þó eiga mestan þátt í auknu samstarfi á fyrstu árum rannsóknanna. 

Hann segir þátttöku norska félagsins ekki síður vera fréttir en undirritun leyfanna í dag, en það gefi verkefninu meiri kraft. „Við lítum á það sem mikinn styrk fyrir málið að fá norska þátttöku. “ Norðmenn munu á næsta ári opna svæðið sín megin, þegar norska þingið hefur samþykkt málið. Í framhaldinu munu þeir einnig fara í útboð á svæðinu sín megin. „Við búumst við því innan tveggja ára verði málið komið af stað líka Noregsmegin við línuna og skiljanlega hafa þeir áhuga á að vera með á í leyfunum á Drekasvæðinu okkar megin“ segir Steingrímur.

Þrátt fyrir góð fyrirheit segir Steingrímur nauðsynlegt að hafa fæturna á jörðinni. „Þetta er ekki ávísun á olíu- eða gasvinnslu á allra næstu árum. Það er miklu líklegra að framundan sé 5 til 10 ára könnun á svæðinu áður en umsóknir bærust um boranir.“

Bent hefur verið á að enginn af risunum, sem meðal annars hafa sótt um leitar- og vinnsluleyfi á færeyska og grænlenska landgrunninu, sótti um leyfi hér við land. Steingrímur segir að Ísland hafi breytt laga- og skattaumhverfinu í samræmi við nágrannalöndin og segir ekkert í umgjörðinni sem hafi þar áhrif. Það sé frekar áhættan og tiltrú manna á lítið skoðuðum svæðum sem hafi áhrif. „Félög sem eiga kost á því að sækja um í Barentshafi eða Norðursjónum, þar sem málið er þekkt og liggur fyrir, þau líta kannski á það sem öruggari kost heldur en að nema nýtt land þarna [á Drekasvæðinu]“

Ekki er búið að ákveða næstu skref í olíuævintýrinu og hvort eða hvenær farið verður í næsta útboð, en svæðið býður upp á pláss fyrir fleiri leyfi. „Það er pláss fyrir fleiri ef út í það er farið og það verður metið þegar að því kemur“ segir Steingrímur

Tengdar fréttir

Olíuleit á Drekasvæði

Leyfi Eykon til olíuvinnslu afturkallað

• Ákvörðunin kemur Heiðari mjög á óvart
• Gefa eftir leyfi á Drekasvæðinu
• Fjórir milljarðar vegna olíuleitar
• Vinnslan hagkvæm þrátt fyrir lágt verð

» Fleiri tengdar fréttir

• Blogga um frétt